Mało pëszny Dzéń Dobëcô

Zełeńsczi dôł w dekrece zgòdã na przeprowadzenié paradë w Mòskwie. Pò ni Pùtin gôdôł gazétnikóm, że kùńc kònfliktu na Ùkrajinie je ju krótkò.

Przez grozbë atakù ùkrajińsczich dronów na Mòskwã òb czas paradë w Dniu Dobëcégò, Ruscë w kòntaktach z Ùkrajiną i z pòmòcą Zjednónëch Stanów żorgelë ò zawieszenié barnie w dniach òd ósmégò do dzesątégò maja. Chcelë za to zabédowac wëmianã tësąc rusczich na tësąc ùkrajińsczich pòjmańczików. Prezydent Ùkrajinë Wòłodimir Zełeńsczi w piątk ósmégò maja wëdôł dekret, w jaczim z humanitarnëch przëczënów zgòdzył sã na gwarancje bezpiekù dlô chcącëch brac ùdzél w pòchadze. „Decydëjã sã dac zgòdã na przeprowadzenié paradë w gardze Mòskwie (Ruskô Federacjô) dzewiątégò maja dwa tësące dwadzestégò szóstégò rokù. Na czas paradë (òd dzesąti gòdzënë kijiwsczégò czasu dzewiątégò maja dwa tësące dwadzestégò szóstégò rokù) òbéńda Czerwionégò Placu mô bëc wëłączonô z planu zastosowaniô ùkrajińsczi barnie” – je napisóné w dekrece. Dali pòdôwô dokładné geògraficzné kòòrdinatë Czerwionégò Placu. Nimò tegò zagwësnieniô, Ruscë nie delë sã na widzałą paradã jak w ùszłëch latach. Wszëtkò dérowało sztërdzescë piãc minut, przemaszerowelë sami żôłnérze, jedurnym wòzã na paradze bëła limùzyna, a miast tanków i rakétowniców pòzeszłim wëskrzënilë blós film ò mòdernym ùzbrojenim. Wicy wòzów zabezpiéczało teren wkòl Czerwionégò Placu, w tim improwizowóné procëmdronowé systémë zamòntowóné na cywilnëch aùtołach. Żôłnérze stojelë téż na bùdinkach wkòl placu, zdrzącë w niebò za zagrôżbą. W ten dzéń równak ùkrajińsczé dronë w rusczi stolëcë nie zawitałë. Na paradze bëło téż wiele mni gazétników jak wiedno. Przed paradą w Mòskwie wëłączëlë mòbilny internet i ògrańczëlë esemesową łączbã. Z zagrańcznëch wódców bëłë głowë Biôłorusczi, Laòsu, Malezje i Serbie. Zafelowało na paradze prezydenta Słowacczi Roberta Ficë, chtëren akùrôt béł w Mòskwie.
Pózdni na Kremlu prezydent Rusczi Federacje Władimir Pùtin gôdôł z gazétnikama. Rzekł, że wedle niegò całô wòjna z Ùkrajiną mô sã ju do kùńca. Pòdzãkòwôł Zjednónym Stanóm za zletcziwanié mirnëch òbgôdków, ale pòdczorchnął, że negòcjacje są sprawą leno Rusczi a Ùkrajinë. Gôdôł równak, że jakno pòstrzédnika w rozmòwach widzôłbë ùszłégò kanclerza Niemiec Gerharda Schrödera. Òd Roberta Ficë doznôł sã, że Wòłodimir Zełeńsczi je w pòszëkù na pòtkanié. Pùtin tegò nie wëklucził i gôdôł, że mògłobë òno bëc w Rusce abò w jaczims neùtralnym kraju, chòc dopiérze pò kùńcowëch dogôdkach w sprawie miru na dłëgszą perspektiwã. Gôdôł do tegò, że wòjnã sprowòkòwałë kraje Zôpadu, jaczé biôtkùją z Ruską rãkama Ùkrajińców.

H.S.Sz.