Spùscëlë szandarã do rzéczi krokòdilów

Kapténa Johan Pòtgieter miôł zabrac cało krokòdila z òstrowù na rzéce. Nie wiedzôł, czë gôd je żiw.

W Repùblice Pôłniowi Africzi òb czas zaleniégò zadżinął jeden bismón. Służbë nalazłë jegò aùtół na snôdczëznie nad dobróną rzéką Kòmati. Chłopa tam nie bëło. Wedle pòdszukòwnëch bismón mógł próbòwac przejachac jeden nisczi mòst nad rzéką, ale jegò aùtół sã zesënął i spôdł do wòdë. Jegò szoférã mógł zabrac ji żoch, czej próbòwôł wëlezc z wòzu. W dole rzéczi trafilë òstrów z krokòdilama, co sã grzałë na słuńcu. Jeden miôł nadãti żót i wëzdrzôł, jakbë brôł gò spik. Wësłóné karno pòlicje zastrzelëło gada docygającë, że mógł òn zeżgrzéc zadżinionégò. Pò trafienim krokòdil dorazu zwrócył sã na plecë i zdôwało sã, że je dót. Niglë równak zabrelë sã za dostanié do jegò cała, gôd wstôł i òdpłënął kąsk w górã rzéczi, gdze legnął sã na jinym òstrowie. Zwierzã krëwawiło i chùtkò wkòl niegò zebrało sã wiele jinëch krokòdilów. W rzéce bëłë téż hipòpòtamë i kamienie. Szandarzë ùznelë, że pòdpłënąc wëcmanim na czôłnie bëłobë za baro réskòwné. Kapténa Johan Pòtgieter, òd trzëdzescë òsmë lat w pòlicje, zgòdzył sã sóm zabrac krokòdila z òstrowù. Spùscëlë gò pò linie z helikòptra. Szczestlëwie szpùkòwanié jegò skrzidłów wëstraszëło jiné krokòdile, te zwiornãłë z òstrowù. Czë ten jeden òstałi jesz żił, szandara nie wiedzôł. Wiszącë na linie ni mógł sã ju wëcopac, bò z pilotã helikòptra ni miôł kòntaktu. Dôł sã spùscëc kòl zwierzëca i zarzesził linã wkòl jegò cała. Jak pózdni gôdôł, dopiérze pò tim, że gôd gò nie zaatakòwôł, wiedzôł, że je bezpieczny. Helikòpter zabrôł chłopa z całã krokòdila z òstrowù. W żóce zwierzëca bëłë néżczi lëdzczégò cała a téż szesc bótów. Znajarze zbadérëją, czë człowiekã zjadłim przez krokòdila béł zadżiniony bismón.

H.S.Sz.