Reklama

Sztatura dlô zleczińcë z pùjkã

Klëka

13/05/2026 17:33

Telly Savalas, jeden z aktorów, co grôł rolã Ernsta Stavro Blofelda. Zdrzódło: https://pl.wikipedia.org/wiki/Ernst_Stavro_Blofeld#/media/Plik:Telly_Savalas_Kojak_1973.JPG

Prôwdac fikcjowi, ale nôbarżi znóny Gdinión dożdże sã ùtczeniô na szasëje Ejsmònda. Gipsową wersjã jegò sztaturë bãdze szło òbaczëc ju w czerwińcu.

Karno lubòtników ksążków i filmów ò Jamesu Bòndze z Trzëgardu chce ùtczëc jednã z pòstacjów. Nie chòdzy równak ò przédnégò heroja, ale jednégò òd jegò nôwikszich wargów – Ernsta Stavro Blofelda. Wódca terroristiczny òrganizacje SPECTRE, jeden z nôbarżi znónëch zleczińców swiatowi pòpkùlturë, ùrodzył sã prawie w Gdinie dwadzestégò ósmégò maja tësąc dzewiãcset ósmégò rokù jakno syn Pòlôcha i Greczónczi. Je ta infòrmacjô w ksążce „Thunderball” Iana Fleminga. Datã ùrodzeniô aùtór pòżëcził zleczińcë swòjã gwôsną, le mógł tedë nie wiedzec, że w nen czas Gdiniô bëła kaszëbską rëbacką wsą. Lubòtnicë Bònda ùznelë równak, że wcyg mòże to bëc pësznô promòcjô dlô gardu. Ùrząd béł zgòdą i przekôzôł dzałkã ò wiéchrzëznie trzech kwadratmétrów na pòstawienié tam sztaturë méstrowi przesprawiégò. Wëżłobi jã profesór Wòjcech Sãczawa z Akademie Piãknëch Kùńsztów we Gduńskù. Ju je zrobiony fùlskalowi gipsowi mòdel. Blofeld sedzy w fòtelu i mùjkô swòjégò biôłégò pùjka, tak jak colemało pòkazéwelë gò w filmach. Òd kùńca maja przez dwa tidzenie mòdel bãdze szło òbaczëc w Nadmòrsczim Hotelu we Gdinie. Rëgnãła zbiérka dëtków na òdléw sztaturë z bronzu, jakô kùreszce mô stanąc na przëdzelonym placu przë szasëje Ejsmònda. Do zebraniô je kòl dwasta sétmëdzesąt tësący złotëch. Wszëtkò to dostónie żłobiôrz. Ùdbòdôwôcze chcelëbë zdãżëc ze wszëtczim do gebùrstachù Blofelda za rok. Są dbë, że pòstawienié pamiãtnika taczi pòstacje mòże rozpromòwac Gdiniã w swiece i scëgac lubòtników pòpkùlturë.

H.S.Sz.

Źródło i opracowanie własne