Reklama

ZJAZDOWÉ NÓTË

Bëlôk - czôrno na biôlim

25/03/2026 16:43

Hewò wariacjô na témã frańtówczi "Kaszëbsczé nótë", napisónô w 2012 rokù na Zjôzd Kaszëbów w Sopòce. "Nótë" nôgróné bëlë dopiérze w 2020 rokù na Zjôzd Kaszëbów w Pùckù - równak tegò roku Zjazdu, bez chërã kòrunawirusa (Covid), nie bëlo...

Jidą krótczi, jidą dłudżi
Z wszëtczich Kaszëb stolëców
Grają basë, grają skrzëpczi
Piesniã bëlnëch Kaszëbów!

Ref. Dłudżé basë, krótczé skrzëpczi
Prosté ridle, krzëwé hôczczi.
Wóz bez slédnëch jedze kół
Je półtorôk, bãdze pół!

Jidą z ridlã, jidą z tëczą
Hôczi wësok w górze niesą.
Gbùrzë co wëlezlë z chòjnë
Bùszno trzimią widłë gnojné!

Ref. Dłudżé basë, krótczé skrzëpczi
Prosté ridle, krzëwé hôczczi.
Wóz bez slédnëch jedze kół
Je półtorôk, bãdze pół!

Jidą prosti, jidą krzëwi
Slôdë jadą kòłã wòznym.
Wiozą na tôrg sëté ptôczi
W miészkach zwònią półtorôczi!

Ref. Dłudżé basë, krótczé skrzëpczi
Prosté ridle, krzëwé hôczczi.
Wóz bez slédnëch jedze kół
Je półtorôk, bãdze pół!

Klëkã rozgłosziwô wół:
To je całé a to pół.
Nótë môłé, nótë wiôldżé
Grają jinstrumeńta wszelczé!

Ref. Dłudżé basë, krótczé skrzëpczi
Prosté ridle, krzëwé hôczczi.
Wóz bez slédnëch jedze kół
Je półtorôk, bãdze pół!