Òrganizatorzë przëcygnãlë chãtnëch ògłosã ò rozdôwanim dëtków. Nie bëlë w sztãdze zapanowac nad rzmą, jakô zaczãła bic sã ò weńdzenié na jôrmark.
We strzodã 18. gòdnika w gardze Ibadan w pôłniowi Nigerie na terenie Mùzelmańsczi Strzédny Szkòłë béł zòrganizowóny gòdowi jôrmark. Do przińscô na niegò òrganizatorzë zachãcywelë mieszkańców gardu midzë jinszima tim, że mielë rozdac piãc tësãcóm dzecy dëtczi, pò 5000 naira (kòl 13,18 zł). Bëtnicë wëdarzeniô mielë téż dostac jestkù za darmôka. Mieszkańcë rãdo òdpòwiedzelë na rôczbã i przëszlë na jôrmark we wiôldżi rzmie. Òrganizatorzë stracëlë kòntrolã nad wielëną lëdztwa na jôrmarkù i biôtkama midzë tima, co chcelë sã dostac na teren szkòłë, co doprowadzëło do tegò, że lëdze zaczãlë pò sobie czwòrdac. Tak zdżinãło co nômni 35 dzecy. Wiele z nich téż sã zgùbiło, a służbë zachãcywają jich starszich do szukaniô za nima pò bòlëcach.
Szandarzë dlô wëwidnieniô sprawë lëchi òrganizacje wëdarzeniô zatrzimelë òsmë lëdzy, jaczé słëchałë do karna przédnëch òrganizatorów jôrmarkù, w tim znóną môlowim persónã Naomi Silekunolã. Prezydent Nigerie Bola Tinubu przesłôł kòndolencje lokalny spôlëznie i rodzëznóm zaczwòrdónëch dzecy.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie