Domôcô wòjna midzë armią Sudanu a zbùńtowónyma Sëłama Chùtczégò Wspiarcégò òd swòjégò zôczątkù kòształa żëcé ju setczi tësãcy lëdzy.
W piątk 25. séwnika dzejarze prôw człowieka delë do wiadë, że òb jeden atak paramilitarny fòrmacje Sëłë Chùtczégò Wspiarcégò na sudańsczi stan al-Dżazyra òstało zabitëch co nômni 50 lëdzy, a 200 bëło renionëch. Krëwawé dzejania biôtkarzów za cél wzãłë so wse i cywilné lëdztwò. Sudańskô armiô, jakô prowadzy biôtkã z Sëłama Chùtczégò Wspiarcégò, nie je w sztãdze ewakùòwac cywilów ze wsów òstrzéliwónëch przez atakòwników z pòzdrzatkù na mòc òstrzélu. Sudańsczé mediczné strzodowiszcze zaapelowało do Òrganizacje Zjednónëch Nôrodów ò wëwiarcé cëskù na ùsadzenié humanitarnëch kòridorów do òstrzéliwónëch môlów.
Chcemë dodac, że òbie starnë kònfilktu są òbskarżiwóné ò niehumanitarné prowadzenié wòjnë i niebrëkòwné zwikszanié cywilnëch òfiarów biôtków.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie