Reklama

Alarmòwé numrë w Aùstralie nie dzejałë trzënôsce gòdzyn

Klëka

23/09/2025 10:04

Aùtór: Aotearoa; zdrzódło: https://pl.wikipedia.org/wiki/Australia#/media/Plik:Australia_mapa.png

Awariô kòształa żëcé sztërë òsobë, jaczich rodzëznë ni mògłë skòntaktowac sã ze służbama.

We czwiôrtk òsmënôstégò séwnika przez trzënôsce gòdzyn przez techniczną felã w Aùstralie nie dzejôł alarmòwi numer, òbsłëgiwóny przez télekòmùnikacjową firmã Optus. Wicy jak szescset pòłączeniów nie òstało zrealizowóné, przede wszëtczim ze stanów Pôłniowô Aùstraliô i Zôpadnô Aùstraliô a téż z Nordowégò Teritorium. Wëszëznë dałë do wiadë, że w tim czasu przez felënk łączbë ze służbama ùmarłë sztërë òsobë, w tim òsmëtidzeniowé dzeckò. Szef firmë Stephen Rue w serie òswiôdczeniów przez weekend przeprôszôł wszëtczich, jaczi ni mòglë sã skòntaktowac ze służbama, złożił kòndolencje rodzëznóm ùmarłëch, zapòwiôdôł rëgniãcé z szëkbą za winnyma, a téż scwierdzył, co firma przez trzënôsce gòdzyn nie bëła swiądnô awarie, a czej ju sã doznała, felã ùdało ji sã dorazu ùprawic, co mô wëwidniwac, dlôcze służbë nie dostałë sygnału ò tôklu. Pùbliczną wiadã ò awarie firma dała dopiérze sztërdzescë gòdzyn pò ji wëstąpienim. Ministra kòmùnikacje Anika Wells rzekła, że firma ni mô niżódnégò wëtłómaczeniô, a Stephen Rue miôłbë ùstąpic ze stanowiszcza. Wëdowiédzã w sprawie mają zaczic państwòwé służbë. Pò szlachòwny awarie dwa lata nazôd, w jaczi równak nie bëło smiertnëch òfiarów, firma Optus dostała dëtkòwą sztrôfã dwanôsce miliónów aùstralijsczich dolarów, co je równoznaczëną kòl dwadzesce òsmë i pół milióna złotëch.

H.S.Sz.