Reklama

Amerikańsczi szandara na kòscersczi kòmendze

Klëka

01/10/2025 10:48

Esteban Òrtega z Kòlorado béł na Kaszëbach ju drëdżi rôz. Szandarzë z Kòscérznë òpòwiedzelë mù ò swòji robòce a téż pòkôzelë swòje wòzë.

W pòniedzôłk dwadzestégò dzewiątégò séwnika kòscérską kòmendã pòlicje òdwiedzył Esteban Òrtega z Pòlicje Breckenridge w Kòlorado, czim kòmenda sã pòchwôlëła na swòji internetowi starnie. Òb czas swòjich drëdżich òdwiôdënów na Kaszëbach, gòsc chcôł pòznac szlachòwnotë i różnicë robòtë szandarë w Zjednónëch Stanach a w Pòlsce. Kòscersczi kamrôcë òpòwiedzelë mù ò historie pòlsczi pòlicje a téż jich gwôsny kòmendë. Òsoblëwie Òrtega miôł bëc zaczekawiony pòlicjowima aùtołama, jaczé przëmiérzôł do tëch brëkòwónëch w Americe. Na kùńc wizytë dostôł òd szandarów nôsziwkã z emblematã môlowi jednostczi. Òrtega, jaczi swòjã robòtã w pòlicje zaczinôł w elitarny jednostce SWAT, a pòtemù przeniósł sã do patrolowaniô gardu, żebë bëc krótkò rodzëznë, béł rôd z wizytë w Kòscérznie i rzekł, że bëła to dlô niegò wôrtnô wëmiana warkòwégò doswiôdczeniô, ale téż pòznaniô lokalny spòlëznë.

H.S.Sz.

Załączniki