Reklama

Artur Jabłońsczi òdebrôł Medal Stolema

Klëka

19/03/2026 23:35

Òd zôczątkù do kùńca pò kaszëbskù achtnãlë jednégò z przédniészich ambasadorów kaszëbsczégò jãzëka i juwernotë.

We wtórk sétmënôstégò strëmiannika w Stôromiesczim Rôtëszu we Gduńskù w Mieszczańsczi Zalë jedno z nôwôżniészich wëapartnieniów w kaszëbsczi rësznoce dostôł Artur Jabłońsczi. Jak wiedno przëznôwcama Medalu Stolema bëlë nôleżnicë Karna Sztudérów Pòmòraniô. Przëjachelë gòscë, jaczi towarzëlë latosémù laùreatowi na rozmajitëch etapach jegò kaszëbsczi stegnë, służącë wspiarcym i pòdskacënkã. Jak szło ùczëc z laùdacje, Artur Jabłońsczi dostôł nôdgrodã za swòje wëtrëwałé dzejanié na gónie samòrządowim, lëteracczim, edukacjowim i spòlëznowim. Do karna stolëmòwców nôdgrodzonégò wprowadzył laùreat sprzed dwùch lat, Dariusz Majkòwsczi. Sóm nôdgrodzony w swòji przemòwie pòdczorchiwôł, jak wiele znaczi dlô niegò achtnienié przez młodëch, gôdôł ò placach na jaczich òni dzejają w kaszëbiznie bùten institucjów, midzë jinszima w Internece, a téż zachãcywôł do ùnôszaniô sã na wëszawë i żëcégò w kaszëbsczim jãzëkù. Przëmiar taczégò żëcô delë òb czas galë sami Pòmòrańcë, jaczi latos jã całą pòprowadzëlë pò kaszëbskù – w tim òdczët protokołu z welownégò zebraniô, co wiedno w slédnëch latach bëło jesz pò pòlskù. Òbòniło całosc ju trzecy rôz gòszczącé na „Stolemach” mùzyczné karno „Demore” z Kòscérznë. Dobiwcë nôdgrodë sertno winszëjemë achtnieniô.

H.S.Sz.

Źródło i opracowanie własne