Na nordze Beninu pò atakach karna zdrëszonégò z Al-Kaidą zdżinãło cziledzesąt żôłnérzów. To nôwicy òfiarów òd zôczątkù dekadë.
W ùszłim tidzeniu islamsczi biôtkòwnicë Karna Wspiarcô Islamù i Mùzelmanów, pòrzeszonégò z Al-Kaidą, delë do wiadë, że w atakach na dwie wòjskòwé wachë w Beninie ùdało jim sã zabic sétmëdzesąt żôłnérzów. Pòcwierdzëłë tã lëczbã przëzérającë sã rozwijowi sprawë amerikańsczé wëdowiédzowé agencje. Wëszëznë Beninu z zôczątkù gôdałë ò smiercë blós òsmë żôłnérzów, ale w nônowszim òswiôdczenim przëznało, że zdżinãło piãcdzesąt sztërzech. Ataczi dżihadistów na kraje nad Gwinejską Hôwingą są partã strategie Al-Kaidë na rozkòscérzanié swòjégò militarnégò i pòliticznégò cëskù. Karno Wspiarcô Islamù i Mùzelmanów mô swòjã sedzbã w Mali i stamtądka czerëje atakama na pôłniowëch sąsadów tegò kraju. W slédnëch latach nôwicy taczich zdarzeniów bëło w Beninie i Togò. Benińczicë przëznôwają, że òd jich zôczątków piãc lat slôdë, tej z ùszłégò tidzenia béł nôpòwôżniészi. Zapòwiôdają biôtkã i dobëcé nad islamistama.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie