Reklama

Atak diwersje na banową liniã w Pòlsce

Klëka

19/11/2025 08:27

Bëła grozba wësadzeniô pasażérsczégò cugù. Służbë zakłôdają swiądné dzejanié na pòlét cëzégò rządu.

W niedzelã szestnôstégò smùtana na banowi linie z Warszawë do Lublina reno i wieczór strzimóné òstałë dwie banë. We wsë Mika w garwòlińsczim krézu chtos zdetonowôł wëbùchòwi ladënk i przerwôł szinã – maszinista jedny z renëch banów scwierdzył, że felëje kòl jednégò métra, a w czas zascygnął banã, retëjącë jã przed wëkòlibanim. Wieczór krótkò Pùławów ùszkòdzonô szina wëbiła rutë w wagònach cugu, jaczi zarô òstôł zatrzimóny. Òbie banë bëłë pasażérsczé. W zdarzeniach nicht nie béł reniony. Bióro Nôrodnégò Bezpiekù pòdało, że nôgwësni doszło do aktu diwersje. Pòcwierdzył to premiéra Donald Tusk, jaczi w apartnym nagranim rzekł téż, że ladënk, jaczi ùszkòdzył szinã, gwës pierwòszno miôł bëc òdpôlony òb czas przejazdu banë, żebë jã wësadzëc. Krajowô Prokùratura rëgnãła z wëdowiédzą w sprawie aktów diwersje ò terroristicznym charakterze dlô cëzëch służbów procëm Pòlsce. Na wtórk reno òsmënôstégò smùtana je zaplanowóné nadzwëkòwé zéńdzenié Kòmitetu do sprôw Nôrodnégò Bezpiekù z ùdzélã wòjskòwëch wódców, szefów państwòwëch służbów i przedstôwcë prezydenta.

H.S.Sz.