Reklama

Atak na bòlëcã w Kòngù

Klëka

23/05/2026 07:14

Òdj. Alvaro1984 18; zdrzódło: https://pl.wikipedia.org/wiki/Demokratyczna_Republika_Konga#/media/Plik:Location_DR_Congo_AU_Africa.svg

Chcelë dostac cało lokalnégò spòrtówca. Nie wierzëlë, że mógł ùmrzéc na ebòlã.

W Demòkraticzny Repùblice Kònga wëbùchło pòszëdło ebòlë. Kòscérzi sã tam rzôdczi szczép wirusa, Bùndibùgyo. Przez wiele tidzeniów lékarze ni mielë chòroscë wëkrëté, bò ù lëdzy, co ùmiérelë, robilë testë na jinszé szczépë, a wëniczi bëłë tej negatiwné. Minister zdrowiégò Samùel-Roger Kamba pòcwierdzył, że wëszëznë na terô wiedzą ò sto piãcdzesąt dzewiãc ùmarłëch na ebòlã. Lëdztwò colemało nie zawiérzô wëszëznóm, bòlëcóm i bùtenrządowim òrganizacjóm. Winëją je ò gôdanié ò pòszëdle, żebë zarobic na tim dëtczi. W gardze Rwampara na wschòdze kraju doszło do atakù na bòlëcã pò tim, jak ji administracjô òdmówiła wëdaniô cała ùmarłégò jegò rodzëznie i drëchóm. Miono i nôzwëskò nie òstało pòdóné, ale béł to pòpùlarny balôrz z lokalnégò fùsbalowégò karna. Cała ùmarłëch na ebòlã wëmôgają pòchówków z ùchòwanim òstrëch procedurów. Matka balarza gôdała równak, że òn ùmarł na żotny tifùs, a nié ebòlã. Młodi lëdze włómelë sã na teren bòlëcë, pòdpôlëlë rozstawioné pòd nią celtë, a razã z nima téż cało jednégò ùmarłégò, jaczé bëło trzimóné w celce. Atakòwników roznëkała pòlicjô, jakô przëjachała na plac i wëstrzélëła czile razy na òstrzégã. Bòlëca ë ji robòtnicë są terô pòd òchroną wòjska.

H.S.Sz.

Źródło i opracowanie własne