Reklama

Atak na Iran, Chamenei zabiti

Klëka

01/03/2026 14:05

Ali Chamenei. Òdj. Khamenei.ir; zdrzódło: https://pl.wikipedia.org/wiki/Ali_Chamenei#/media/Plik:Ali_Khamenei_14040323_(1)_(cropped).jpg

Zjednóné Stanë a Izrael rëgnãłë z òperacją, jakô mô znikwic zagrôżbã ze starnë Iranu i skùńczëc rządë ternëch wëszëznów. Iran òdpòwiedzôł atakama na państwa zdrëszoné z Ameriką.

W sobòtã dwadzestégò ósmégò gromicznika reno Zjednóné Stanë i Izrael zaatakòwałë Iran. W pierszich gòdzënach òstrzałów i nalotów w swòjim biórze w Teheranie zdżinął nôwëższi wódca Ali Chamenei razã z rodzëzną. Zaatakòwóné òstałë dwadzesce sztërë z trzëdzescë jeden prowincjów kraju. Trafioné òstałë céle tak wòjskòwé jak cywilné. W jednym izraelsczim òstrzale szkòłë dlô dzéwczãt w gardze Minab zdżinãło sto òsmë lëdzy. Czerwiony Półmiesądz pòdôł w sobòtã, że w sëmie w Iranie zdżinãło co nômni dwasta lëdzy, a sétmëset sztërdzescë sétmë bëło renionëch. Stanë a Izrael zapòwiôdają równak prowadzenié ataków co nômni przez czile pòstãpnëch dni, tej te lëczbë sã zwikszą. Irańskô armiô òdpòwiedzała ùderzeniama na Bahrajn, Katar, Zjednóné Arabsczé Emiratë, Kùwejt, Jordaniã i Saùdijską Arabiã, gdze rakétë mierzą w amerikańsczé bazë, latawiszcza i mieszkalné dzélnice. Jednym z wikszich a wôżniészich zaatakòwónëch gardów je Dubaj. Prezydent Zjednónëch Stanów Donald Trump scwierdzył, że célã òperacje „Epickô Fùriô” je cawné znikwienié militarny zagrôżbë ze starnë Iranu, w tim nuklearnégò pòtencjału, a téż zwrócenié reżimù, jaczi tam wzął górã pò Islamsczi Rewòlucje. Samëch Irańczików wezwôł do wëstąpieniô procëm swòjémù rządowi. Pòpiarł gò w tim syn slédnégò szacha i pretendent do tronu, Cyrus Reza Pahlawi. Ten pòdzãkòwôł Stanóm za przërzekłą irańsczémù nôrodowi pòmòc, ale rzekł téż, że terô lëdze sami mają wińc na szasëje i wzyc ùdzél w procëmrządowim pòwstanim.

H.S.Sz.

Źródło i opracowanie własne