Òd rusczégò atakù kasetowima bómbama ùcerpiało wicy jak sto cywilów, w tim dzecy.
W Palmòwą Niedzelã trzënôstégò łżëkwiata na gard Sumë na wschòdny Ùkrajinie spadłë dwie wëstrzéloné z Rusje balisticzné rakétë Iskander, wedle ùkrajińsczi wëdowiédzë nafùlowóné kasetową amùnicją. Célã bëło centrum gardu, w czasu, czej wiele lëdzy wrôcało z nôbòżéństwów Palmòwi Niedzelë. Państwòwô Służba do sprôw Nadzwëkòwëch Stojiznów Ùkrajinë dała do wiadë, że do gòdzënë szósti pò pôłnim lëczba òfiarów atakù sygła trzëdzescë sztërë òsobë, w tim dwòje dzecy, a sto sétmëdzesąt sétmë òstało renionëch. Zabiti òstelë wnetka wszëtcë pasażérowie jednégò z trolejbùsów, co wiozłë wiérnëch wrôcającëch z cerkwie. Ùkrajińsczé wëszëznë pòdôwają, że Ruscë ùmëslno zaatakòwałë cywilów, żebë dac jak nôwikszé stratë. Szef Centrum Biôtczi z Dezinfòrmacją Radzëznë Nôrodnégò Bezpiekù i Òbarnë Andrij Kòwałenkò zmerkôł, że atak béł krótkò pò pòtkanim amerikańsczégò diplomatë Steve'a Witkoffa z Pùtinã w Mòskwie, a szlachòwny Ruscë zrobilë na Krzëwi Róg pò wizyce Kiriłła Dmitriewa w Waszingtonie czwiôrtégò łżëkwiata, czej zdżinãło dwadzesce lëdzy, a renionëch bëło sétmëdzesąt.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie