Czerëjący aùtołã imigracjowi dzejôrz i psychiatra òstôł złapóny i aresztowóny przez szandarów zarô pò atakù. Pòdszukòwny mdą chcelë sã doznac, za czim to zrobił.
W piątk 20. gòdnika wieczór w Magdebùrgù aùtół wjachôł w rzmã lëdzy zéńdzonëch na gòdowim jôrmarkù. Zdżinãło 5 lëdzy, wicy jak 200 bëło renionëch, z czegò 40 cãżkò. Szoférą aùtoła a sprôwcą atakù je 50-latny Saùdijczik Taleb Abdul Dżawad, jaczi mieszkô w Niemiecczi òd 2006 rokù, gdze dotądka robił jakno psychiatra w Bernburgù. Béł téż znóny jakno dzejôrz scygający do Niemców lëdzy ze Saùdijsczi Arabie. Jakno ùszłi mùzelmón kritikòwôł islam. Pùbliczno pòpiérôł téż prawicową partiã Alternatiwã dlô Niemców. Jak dotądka nie béł notérowóny za ekstremisticzné dzejania. Dzejôł sóm. Òstôł aresztowóny i òstóną mù przedstawioné òbwinë za mòrdarstwò. Dérëje szëkba zã tim, co gò pòruszëło do zbrodnie.
Kanclérz Olaf Scholz przëjachôł w sobòtã do Magdebùrga. W swòjim przemówienim òstro pòtãpił czin Saùdijczika, zapòwiedzôł jegò ùkaranié, a téż złożił kòndolencje rodzëznóm zabitëch i pòdzãkòwôł kòl 100 nôleżnikóm ògniowi starżë i 50 retownikóm za chùtką i sprawną pòmòc krótkò pò atakù.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie