Wedle zagwësnieniô rządu w 2026 mô bëc òdnowa i ùrësznienié banowi linie midzë Lëpùszã a Bëtowã dlô przewòzu pasażérów.
We wtórk 8. rujana senatórka karna Lewicë z Partie Razã [pl. Razem] Ana Górskô dała do wiadë, że pò kôrbiónce z ministrã infrasztrukturë Piotrã Malepszôkã rząd zagwësnił ò planach òdnowieniô banowi linie Lëpùsz-Bëtowò w 2026 rokù. Mają bëc tej ùrësznioné na ni przejazdë dlô pasażérów, co baro pòmòże w rozrzeszenim tôklu partowégò kòmùnikacjowégò wëłączeniô Bëtowa. Jistniejącą linią dzysdnia zajimô sã gard Bëtowò i bëtowsczi kréz. Służi òna towarowim przewòzóm, a banë na ni jeżdżą z chùtkòscą 20 km/h. Je òna téż w lëchi stojiznie, a to, jak tłómaczi Ana Górskô, ùniemòżlëwiô wòżenié lëdzy, czej przez niebezpieczné warënczi nawetka towarowé wëcmaniznë òdmôwiają brëkòwaniô ti drodżi. Dzãka przëjãcémù linie òd Pòlsczégò Państwòwégò Banu i ji mòdernizacje te tôkle bãdą mògłë bëc ùprawioné. Pò òdnowienim mô bëc pùszczoné co nômni szesc pôr cugów, jaczé mdą jezdzëłë direktno z Bëtowa do Gduńska i z Gduńska do Bëtowa.
Są wątplëwòtë co do tegò, co pò prôwdze z linią zrobi PPB. W ùszłoce jegò zarządzëna deklarowa, że w przëtrôfkù ji przëjãcô òd włôdzów Bëtowa liniô òstónie zamkłô i rëmniãtô. Przërzek òddaniô ji do ùżiwkù ju w 2026 téż zdôwô sã bëc dosc òptimisticzny. Senatórka Górskô òdpòwiôdô: „Jô tegò przërzeczeniô sã mòckò trzimóm. Bãdã z niegò rozrechòwiwała ministra infrasztrukturë i Pòlsczi Państwòwi Ban”.
HSz
Twoje zdanie jest ważne jednak nie może ranić innych osób lub grup.
Dark, dodôj RSS do artiklów.