Reklama

Baną z Pòrtugalie do Lapònie

Klëka

16/04/2026 15:38

Lulu Ranne. Òdj. FinnishGovernment - https://www.flickr.com/photos/finnishgovernment/52882537822/; zdrzódło: https://pl.wikipedia.org/wiki/Lulu_Ranne#/media/Plik:Hallitusneuvottelut_9.5.2023_(52882537822)_(cropped).jpg

Òd czerwińca dofùlowóny bãdze felëjący dzélëk nôdłëgszégò banowégò sparłãczeniô w Eùropejsczi Ùnie. Chòdzy ò trzë i pół kilométra przez mòst.

Lulu Ranne, ministra transpòrtu Fińsczi, zapòwiedzała òdemkniãcé nowégò banowégò sparłãczeniô ze Szwédzką ju latos w czerwińcu. Chòdzy ò krótëchny dzélëk przez mòst, jaczi parłãczi dwa gardë, fińsczé Tornio ze szwédzką Haparandą nad Bòtnicczim Wikã. Bëło to mòżebné dzãka remòntowi banowiszcza w Haparandze. Do niegò pòcygnãlë sztrekã na szerszim, fińsczim rozstawie, jaczi do dzysdnia je pamiątką pò banie Rusczégò Imperium. W Haparandze pasażérowie bãdą mielë przesôdkã na drëgą sztrekã. Bãdą mùszelë przeńc przez stôri bùdink banowiszcza, ale mô to sã dzejac chùtkò i wigódno. Dlô ùrësznieniô sparłãczeniô Fińskô i Szwédzkô zletczëłë w jegò òbrëmim rëch przez grańcã i wëdałë apartné zezwòlenia. Kòształo to trzëdzescë sétmë miliónów eùro, z czegò wikszosc zapłacëła Fińskô z samòrządama, a mniészi dzél Szwédzkô. Chòc inwesticjô to prôwdac niecałé trzë i pół kilométra drodżi, ji zwënégòwanié ùsadzëło nowi banowi rekòrd. Terô bãdze szło samą baną dojachac òd lapòńsczégò Kòlari jaż do Lagòsu w Pòrtugalsce. To je kòl piãc tësący kilométrów i wiele wicy jak z pòrtugalsczégò Lagòs do Riksgränsen na norweskò-szwédzczi grańcë, co bëło dotądka nôdłëgszim sparłãczenim w òbéńdze Eùropejsczi Ùnie. W nôblëższich planach je pòcygniãcé do Fińsczi sztreczi ò eùropejsczim rozstawie jaż do gardu Kemi, co do niegò sã baną jedze dwadzesce piãc kilométrów. Je to part programù Rail Nordica, mającégò sparłãczëc Fińskã z Norweską i Szwédzką przez sztreczi wedle eùropejsczégò sztandardu. Mô bëc zwënégòwóny w pòstãpny dekadze.

H.S.Sz.

Źródło i opracowanie własne