Reklama

Baszar al-Asad òtrëti, béł w kriticzny stojiznie

Klëka

03/10/2025 21:44

Autór: Khamenei.ir; zdrzódło: https://pl.wikipedia.org/wiki/Baszszar_al-Asad#/media/Plik:Bashar_al-Assad_in_May_2024.png

Rusczé służbë nie ùpilowałë ùszłi głowë syrijsczégò państwa. Dôwny diktatór wëszedł ju z bòlëcë. Sprôwca òtrëcô nie je znóny.

We czwiôrtk drëdżégò rujana Syrijsczé Òbserwatorium Prôw Człowieka przekôzało wiadła ò zdrowim Baszara al-Asada na wënëkanim. Pò tim, jak łoni w gòdnikù ùszłi prezydent Syrie òstôł òbalony przez rebeliantów, azyl dała mù Ruskô. Tam żił z òchroną przëznóną òd rządu. W ùszłim tidzeniu miôł równak òstac òtrëti ë béł lékarzony w jedny bòlëcë w Mòskwie. Òb ten czas òdwiedzac gò mòglë leno jegò brat Maher i ùszłi prezydencczi sekretôrz Mansur Azzam. Béł w kriticzny stojiznie, ale w kùńcu òzdrowiôł i w pòniedzôłk òstôł wëpisóny. Priwatné zdrzódło cytowóné przez Syrijsczé Òbserwatorium Prôw Człowieka cwierdzy, że célã miało bëc òsmiészenié Rusczi i smierc òbalonégò diktatora. Nie je równak wiedzec, chto przeprowadzył atak.

H.S.Sz.