Zwierzãta nie zdrzałë za prawnyma dogôdënkama i pòzwòlëłë zaòbszczãdzëc miliónë.
W òbrëmim programù rewitalizacje rzéczi Kładawë w pilzneńsczim kraju w Czesce dérowałë negòcjacje midzë zarządzëną Wòjskòwëch Lasów a Zarządzëną Wód Wôłtawë w sprawie gwôsnoscë gruńtów w górach Brdach i bùdacje damë w òkòlim Padrťsczich Błotków. Bëłë ju w przërëchtowaniu planë i wniósczi ò zezwòlenia na ji pòstawienié, le òkôzało sã, że nie bëło to brëkòwné. Nie bôczącë na biórokracjã, damã zbùdowałë bòbrë. „Bóbr je w sztãdze to pòstawic w jednã, nôwëżi dwie noce. Człowiek za to mùszi dostac pòzwòlenié, wòdnoprawné rozsądzënczi, a tej mòże zdrzec, czë bãdze miôł na to dëtczi. A i tej człowiek to pòstawi kòparką wierã w tidzéń” – gôdô zoòlog Jiří Vlček. Zwierzãta pòstawiłë damã w melioracjowim karnôlu, jaczé przódë lat miało wëkùmóné wòjskò dlô òbsëszeniô terenu dôwnégò pòligònu. Wedle òbtaksowaniów czerownika zarządzënë Òbéndë Chrónionégò Krôjmalënkù Brdów Bohumila Fišera załatwienié sprawë przez bòbrë pòzwòlëło zaòbszczãdzëc nawetka 30 mln czesczich kòrón, co je równoznaczëną wicy jak 5 mln złotëch.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie