Reklama

Bãdze nowô pòmòrskô błogòsławionô?

Klëka

10/02/2026 10:24

Grób s. Adelgùnd. Òdj. Piotr Butowski - https://commons.wikimedia.org/wiki/File:Grobadelgund.jpg

Ùrodzonô w Kwiekach kòl Czerska, zdżinãła mãczelską smiercą w Chònicach. Pelplińsczi biskùp pòcwierdzył, że ji beatifikacjowi proces zacznie sã jesz rôz.

W niedzelã ósmégò gromicznika w chònicczich kòscołach wiérny ùczëlë òdczëtóny edikt òd pelplińsczégò biskùpa Riszarda Kasynë. Tikô sã òn kwestie beatifikacje chònicczi klôsztornicë-mãczelnicë, sostrë Adelgùnd Tumińsczi. Czedës ji proces rëgnął, ale ùstôł na baro wczasnym etapie. Biskùp w edikce przëbôcził żëcé i smierc francyszkanczi ùrodzony w tësąc òsmëset dzewiãcdzesątim czwiôrtim w Kwiekach kòl Czerska. Zabilë jã żôłnérze Czerwiony Armie, czej stanãła w òbarnie jinëch klôsztorniców w Bòlëcë Swiãtégò Bòromeùsza w Chònicach. Biskùp òpòwiedzôł ò dostónëch pòzytiwnëch òpiniach òd Kòmisje Episkòpatu Pòlsczi ë z Apòsztolsczi Stolëcë, a tej kùreszce ògłosył pòdjimniãcé dbë znôwnégò ùrësznieniô beatifikacjowégò procesu sostrë Adelgùnd Tumińsczi. Zwrócył sã do wiérnëch ò pòdzelenié sã wszelejaczima infòrmacjama, co bë swiôdczëłë za abò procëm swiãtoscë klôsztornicë, w tim òpiniama na témã ji mãczelstwa. Prosył téż ò mòdlëtwã, żebë no dzeło skùńczëło sã dokôzanim swiãtoscë francyszkanczi. Edikt do Chòniczón doszedł przed òbchòdama òsmëdzesąti pierszi roczëznë ji smiercë. Dokładno w niedzelã piãtnôstégò gromicznika ù francyszkanków przë szasëje Wësoczi bãdze złożenié kwiatów na grobie sostrë Adelgùnd, różańc i mszô w intencje ji beatifikacje. Wôrt przëbaczëc, że łoni w smùtanie bùrméster Arseniusz Finster pòcwierdzył, że gard włączi sã w planowóną pùbliczną zbiérkã dëtków na pòstawienié pamiãtnika chònicczi mãczelnicë, wedle ùdbë pòsélca Aleksandra Mrówczińsczégò.

H.S.Sz.

Źródło i opracowanie własne