Cywile mielë òstac wëpùszczony. W wagònach pòd starżą biôtkòwników òstôwają żôłnérze i robòtnicë sëłów bezpiekù Pakistanu.
We wtórk jednôstégò strëmiannika biôtkòwnicë Armie Wëzwòleniô Beludżistanu zaatakòwelë banã relacje Kweta–Peszawar w Beludżistanie w zôpadnym Pakistanie. Czej bana wjeżdżiwała do górsczégò tunelu, atakòwnicë wësadzëlë sztrékã przed nią wëbùchòwima ladënkama, a tej weszlë do składu. Dzewiãc wagònama jachało kòl sztërësta pasażérów. Bëlë to w wikszoscë cywile, ale nalazło sã tam téż kòl sto pakistańsczich żôłnérzi. Wedle rzecznika Armie Wëzwòleniô Beludżistanu, chtëren pòcwierdzywô òdpòwiedzalnotã ti separatisticzny òrganizacje za atak, dôwô do wiadë, że òb przejimanié cugù zabitëch òstało czile żôłnérzi. Néga wòjskòwëch a téż ùrzãdnicë służbów bezpiekù òstôwają na pòkładze pòd starżą biôtkòwników, a wëpùszczony òstelë cywile, w pierszi rédze białczi, dzecë, starszé personë i „òbëwatele Beludżistanu”. Dokładné lëczbë co do wielënë zabitëch, przetrzëmiwónëch i ùwòlnionëch baro sã jinaczą midzë tim, co gôdają atakòwnice a lokalné i rządowé media. Je gwës, że kawel wiele lëdzy nie je znóny, bò biôtkòwnicë wëpùscëlë jich i blós pòkôzelë, w jaczim czerënkù jic do nôblëższi stacje, a w tim rejonie mòbilczi ni mają sëgù, a téż ni ma tam przistãpù do Internetu. Biôtkòwnicë domôgają sã wëpùszczeniô Beludżów ùznôwónëch za pòliticznëch sôdzewëch. Grożą, że zabiją wszëtczich przetrzëmiwónëch, żelë wòjskò mdze próbòwało jich òdbic.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie