Reklama

Òbgôdelë zjôzd we Gdinie

Klëka

14/04/2026 21:01

Latosy zjôzd ùpamiãtni stolaté miesczich prôw dlô Gdinie i sétmëdzesątlaté partu Zrzeszeniégò w tim gardze.

W sobòtã jednôstégò łżëkwiata w Szkòłowò-Przedszkòłowim Karnie przë szasëje Pòrãbsczégò we Gdinie bëło zetkanié tamecznégò partu Kaszëbskò-Pòmòrsczégò Zrzeszeniégò. Jakno przédnik partu, gòspòdarzã béł Adóm Labùhn, chtëren gòscył midzë jinszima przédniczkã Kaszëbskò-Pòmòrsczégò Zrzeszeniégò Bòżenã Ùgòwską i prezydentkã Gdinie Aleksandrã Kòszork. To z òrãdzu przërëchtowaniów do dwadzestégò sódmégò Swiatowégò Zjazdu Kaszëbów, pòmëslónégò na jednôstégò lëpińca we Gdinie. Òbgadiwóny béł sztôłt rozegracje. Zjôzd mô sã zaczic pòd pamiãtnikã Tónë Ôbrama, gdze òdtacą wdôrną tôflã. Mają bëc dwie binë: Jedna wikszô kòl Pôłniowégò Mòla, gdze bãdze przédny part imprezë, a mniészô na Placu Wòlny Ùkrajinë, gdze wëstãpòwac bãdą lokalné karna. Gwiôzdą wieczoru mô bëc Nataliô Szroeder. Òrganizatorzë bãdą żorgelë ò ùrësznienié jaż trzech banów Transcassubia, chòc jesz nie pòdelë, jak òne bãdą jezdzëłë i na jaczich warënkach. W Swiatowi Zjôzd Kaszëbów zaangażëją sã téż gdińsczé mùzea i wòjnowô òkrãtowizna. Bãdze turniér Baszczi na „Darënkù Pòmòrzô“, bôtë z Hélsczi Kòsë, zupa z kaszëbsczich malënów czë kònkùrs cyskaniô kamieniã. Drobnotowégò planu i nowëch wiadłów nót wëzerac na mediach Gdinie i Zrzeszeniégò.

H.S.Sz.

Źródło i opracowanie własne