W Lizbònie òb całi rujan mają dërchac protestë ògniarzów, jaczi chcą pierszégò òd dwadzescë dwùch lat pòdwëższënkù zôróbków. Na strzodowi demònstracje biôtkòwelë sã z szandarama.
Òd wtórkù 1. rujana w Lizbònie dérëje sztrajk warkòwëch ògniarzów, jaczi domôgają sã òd rządu premiérë Luísa Montenegro pòdnieseniégò zôróbków i ùprawieniô warënków służbë, co wedle przedstôwców warkòwi zrzeszë je baro brëkòwné – ùstawë regùlującé jich zôróbczi nie bëłe aktualizowóné ju òd 22 lat. We strzodã zjachóny z całi Pòrtugalsczi protestëjący zòrganizowelë manifestacjã przed bùdinkã parlamentu. Czedë ògniarze próbòwelë wlezc bënë, doszło do schwôcczi z kòrdonã szandarów, chtërny brónilë wchòdu do bùdinkù. W biôtce bëłë ùżëté petardë i môłé rakétczi. Protestë wedlë zapòwiesców mają dërchac do kùńca rujana.
Sztrajk wëbùchł w związkù z kritiką rządu za lëché zarządzanié òb czas wëdarzeniów z séwnika. Pòrtugalsczi ògniarze biôtkòwelë tej z ògniã, jaczi spôlił dzesątczi tësãcy hektarów lasów i łąków. Zdżinãło 7 sztëk lëdzy, w tim 4 ògniarzów. Służbë zatrzimałë 74 docygónëch pòdpôliwôczów.
Twoje zdanie jest ważne jednak nie może ranić innych osób lub grup.
Komentarze opinie