Sprôwca gwës przódë dopùscył sã tegò samégò ju trzë razë, le tedë białka ni miała kamerów na chëczë.
Jedna mieszkańcka Człëchòwa òb slédné dwa lata trzë razë zgłôszała na pòlicjã przëtrôfczi, że chtos òblôł ji trzimónégò na òbòrze psa farbą. Nie ùdało sã równak wniesc òbwinë do sądu, bò szandarzë ni mòglë nalezc sprôwcë. Zamòntowała tej na chëczë kamerã, dzãka jaczi jedny nocë w pòłowie maja ùdało sã nagrac, jak do płotu pòdchôdô jeden òd ji sąsadów i wëléwô farbã na zwierzã. Pòlicjô chùtkò gò nalazła i zatrzimała. Ten sã przëznôł do winë. Scwierdzył, że jegò zachòwanié bëło reakcją na bezprzestójné łajanié psa, przez co òn i jegò rodzëzna ni mòglë spac. Sprawą zajimnie sã sąd. Chłop nôgwësni dostónie sztrôfã za narażenié zwierzëca na stres i zagrôżbã zdrowiégò. Zawiadomienié ò dopùszczenim sã przesprawë złożëło Òglowòpòlsczé Towarzëstwò Òchrónë Zwierzãt „Animals”. W rozprawie weznie ùdzél miéwcka psa. Nie bãdze to ji pierszi rôz w sądze, bò wczasni to procëm ni, z pòzdrzatkù na łajającégò pò nocach tósza, bëło prowadzoné pòstãpòwanié, ale tedë sąd nie nalôzł spòdlégò, żebë jã ùkarac.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie