Reklama

Bëlny wëstôwk w Sławòszënie

Kùltura

27/09/2024 12:23

Ju witro, 27 séwnika, w Sławòszënie, w tamecznym Dodomie Kùlturë miona Floriana Cenôwë, mdze wôrtné wëdarzenié. Ò 5 pò pôłnim bãdze ùroczësto òtemkłi pòkôzënk pt. „Z historie wielejãzëcznégò Sławòszëna”.

Jednym z partów ùroczëznë je wëkłôd prof. Justinë Òlkò z Warszawsczégò Ùniwersytetu ò znaczënkù historii w żëcym lokalnëch spòlëznów. Pòtemù ò samim wëstôwkù òpòwiedzą jegò aùtorzë: Mariô Machùt i Artur Jabłońsczi.

Pòkôzënk je zestawiony z 16 tôflów, a pòwstôł dzãka wespółrobòce mieszkańców Sławòszëna i òkòlégò z projektã MULTILING-HIST, jaczi je zjiscywóny pòd czerënkã prof. Justinë Òlkò. Òd plasticzny starnë zrëchtowôł gò Aleksander Widińsczi z technyczną pòmòcą Irénë Parus. Na kaszëbsczi jãzëk przetłómacził gò Mateùsz Titës Meyer.

Pòkôzënk przëbôcziwô dzeje Sławòszëna òd jegò zôczątków (kòl 1300 rokù) jaż do dzysôdnia. Chcemë pamiãtac, że je to wies baro wôżnô w historii Kaszëbów, chòcle dlôte, że ùrodzył sã w ni bùdzëcél naji swiądë i pierszi kaszëbsczi ùsôdzca Florión Cenôwa. Na wëstôwkù òbezdrzëta równak wiele jinëch czekawëch sztótów z dzejów ti nordowi wiosczi, dze môlowi Kaszëbi mielë łączbã m.jin. z Krzëżôkama i wnożnikama z Niderlandów.

Wëstôwk je dzélã projektu MULTILING-HIST, jaczi je ùdëtkòwiony przez Eùropejską Radzëznã ds. Nôùkòwëch Badérowaniów, a zajimô sã taczima môlama jak: Nordowé Kaszëbë, Łatgaliô (w Łotewsczi), òbéńdë, dze mieszkô pierwòszné, rodné lëdztwò Meksykù.

Rôczimë do Sławòszëna!