Co? Dze? Czedë? [3-8.08]

Òd czerwińca je leżnosc pòznac krëjamné kôrtë historie Wiôldżi Wsë, dzãka darmòwim szpacéróm. Prowadnik pòprowadzy waju pò nôczekawszich placach gardu, òpòwiôdającë ò zdarzeniach w jegò historie, pòdczorchiwającë kaszëbsczé tradicje, spôdkowiznã materialny kùlturë a wôrtnotë rodë.

Szpacérë òdbiwają sã dwa razë na tidzéń (w strzodë i sobòtë) ò piąti pò pôłnim – zbiérka przed Dodomã Rëbôka (Miesczi Ùrząd) kòl sz. gen. J. Hallera 19. Strzodë są namienioné òsoblëwie lëdzóm ò słabszi fizyczny kòndicje, tej wanoga mdze w fòrmie przejazdu meleksã. Czas szpacérë to kòl 2 dwùch gòdzyn.

Latos przed nama jesz sztërë taczé rozegracje: w dniach – 3 i 10 (meleks) a téż 6 a 13 séwnika. Je òbrzészk rëchli sã zapisac!

Wszelejaczé wiadła razã z regùlaminã nalézeta na:

https://wladyslawowo.pl/cms/18239/przewodnicy

***

Jes të zez Brus abò òkòlégò? Chcesz naùczëc sã techniczi, kómpòzycje a farwnoscë kaszëbsczégò wësziwkù żukòwsczi szkòłë? Mómë cos dlô Ce!

Stowôra „SPSE – Sport, Pasja, Społeczność, Edukacja” rëchtëje dlô Waju kùrs kaszëbsczégò wësziwkù z mésterką tegò kùńsztu – Iréną Peplińską. Òd 3 séwnika w Szopie Kreatiwnoscë w Brusach, co strzodã pòpôłniama mdą zéńdzenia, gdze pòznôsz spòdlé tegò nôwôżniészégò i nôbarżi rozpòznôwalnégò ôrtu lëdowégò kùnsztu na Kaszëbach.

12 gòdzyn warkòwniów kòsztô blós 150 złotëch. Zapisëwac sã mòże pòd numrã 880 753 939.

***

Bëtowsczé Centrum Kùlturë rôczi na dwa bëlné wëdarzenia, jaczé òstałë przërëchtowóné w òbrëmim projektu „Zamek żyje! Ginące zawody i żywa historia naszej małej ojczyzny”, dzãka ùdëtkòwieniu Mùzeùm Historie Pòlsczi w òbrëmim programë „Patriotyzm jutra!”. Wëdarzenié mô za cél pòpularizacjã i rozwij wiédzë ò dôwnëch warkach a téż òglowò ò historie strzédnëch wieków w Polsce. 4 séwnika ò trzecy pò pôłnim w bëtowsczim zómkù bãdą swiécarsczé warkòwnie. Nót je sã zapisac pòd numrã: 59 822 23 09 abò 784 594 929. Lëczba placów ògrańczonô!

8 séwnika ò czwiôrti pò pôłnim w Zôpadnokaszëbsczim Mùzeùm w Bëtowie òdbãdze sã historicznô prelekcjô pòd titlã „Mistrzowie i czeladnicy. Cechy rzemieślnicze w dawnych wiekach”. Òbie rozegracje są za darmôka.

***

Mùzeùm Pismieniznë i Kaszëbskò- Mùzyczi Pòmòrsczi we Wejrowie żdaje ju blôs do 5 séwnika latoségò rokù na zgłôszanié kandidatur do Kaszëbsczi Lëteracczi Nôdgrodë „Wiatr od morza” za rok 2024. Zgłoszenié je nót wësłac na adresã wejrowsczégò mùzeùm – sz. Zómkòwô 2a, 84-200 Wejrowò.

Pòmòrską Lëteracką Nôdgrodã „Wiatr od Morza” ùsadzył Samòrząd Pòmòrsczégò Wòjewództwa.

Kaszëbskô Lëterackô Nôdgroda przëznôwónô je za òsoblëwé lëteracczé zwënédżi w kaszëbsczim jãzëkù, w tim téż za dolmaczenié na kaszëbsczi jãzëk, zrealizowóné w 2024 rokù abò za całosztôłt lëteracczi robòtë w tim jãzëkù. W ùszłëch edicjach nôdgrodã dobëlë: Stanisłôw Janka, Kristina Léwna, ò. Adóm Sykòra, Ida Czajinô, ks. Jón Walkùsz, Artur Jabłońsczi i Jerzi Stachùrsczi.

***

Kaszëbsczé Mùzeùm miona Frãcëszka Trédra w Kartuzach fejrëje 5 séwnika wiôldżi jëbleùsz 80-lecô. To bëlny czas, żebë przëbaczëc historiã a dzejanié tegò wôżnégò òstrzódka kùlturë na Kaszëbach.

Òb czas wëdarzeniô mdze pòkôzóny film w reżiserie Éwelinë Karczewsczi-Luhm, jaczi przëbliżô dzeje kartësczégò mùzeùm. W programie je téż wernisaż leżnoscowégò wëstôwkù pòd titlã „80 lat minęło”, jaczi przërëchtowała direktórka Barbara Kąkòl, Magdaléna Barganowskô-Òlbrës a Tadeùsz Wanke. Wëstawa pòmòże gòscóm pòznac rozwij mùzeùm òd zôczątkù jegò dzejaniô. Ekspòzycjã mòże òbzerac do 15 smùtana 2025 rokù. Wstãp je za darmôka.

W òbrëmim jëbleùszu òdbãdze sã téż promòcjô albùmù  pòd titlã „Muzeum Kaszubskie w Kartuzach w obiektywie Ryszarda Mielewczyka”.

***

Pòmòrsczi Òstrzódk Rehabilitacje Dzëczich Zwierzãtów „Ostoja” razã z gminą Somònino rôczą na szpacérë, jaczé mdą leżnoscą do pòznaniô lokalny faùnë i reglów òdpòwiedzalny pòmòcë zwierzãtóm.

W òbrëmim projektu pt. „W trosce o dzikość – pomagaj z głową! Edycja 2025” òdbëłë sã ju 2 szpacérë, a slédny mdze 6 séwnika w Òstrzëcach – zbiérka ò dzesąti do pôłnia na przédnym parkingù w centrum, kòl Turisticzny Infòrmacje.

Wanodżi mają za cél ekòlogiczną edukacjã a pòpularizacjã wiédzë ò dzëczich zwierzãtach wkół naju. Bëtnicë a bëtniczczi pòd òkã szpecjalistë mdą nasłëchòwac ptôchów, ùczëc sã rozpòznawac szlachë bëtnoscë zwierzãtów i dowiedzą sã, jak òdpòwiedzalno dzejac w przëtrôfkù pòtkaniô z renionym zwierzãcã.

***

Mùzeùm Kaszëbskò-Pòmòrsczi Pismieniznë i Mùzyczi we Wejrowie sertno rôczi na LXXXIV „Spotkania z muzyką Kaszub” pòd titlã „Òżniwinë”. Kòncert mdze w sobòtã 6 séwnika ò szósti pò pôłnim w sedzbie wejrowsczégò mùzeùm kòl sz. Zómkòwi 2a.

Séwnikòwi kòncert parłãczi sã z lëdowim òbrzãdowim kalãdôrzã. W tim cządze lëdze dzãkòwelë za zebranié plonów i prosëlë ò jesz lepszi zbiorë w przińdnoce. Przédną znanką òżniwinów béł wińc, jaczi nioslë żniwiarze gòspòdarzóm – nôczãscy bëła to fòrma kòrónë abò kòła. Òd zôczątkù midzëwòjnowégò cządu òżniwinë zaczãłë jic w starnã barżi institucjonalną – gminną, krézową, parafialną, jakô je dozérónô do dzysdnia.

W dbie ò ùchòwanié tradicjowégò repertuaru, w mùzealnym kòncerce zabrzëmią stôré kaszëbsczé òbrzãdowé piesnie parłãczoné z zabëtima òracjama, a drëdżi dzél wieczoru mdze szlachòwac za lëdową zôbawą, wëfùlowóną spiéwã a tuńcã.

Wëkònôwcë:

Kaszëbsczé Karno Piesnie i Tuńca „Przodkowianie” pòd direkcją Jerzégò Soliwòdë

Słowò ò mùzyce – prof. Witosława Frankòwskô

Wstãp na wëdarzenié je darmôk!