Co? Dze? Czedë? [4-9.11]

Warkòwnie kaszëbsczégò tuńca we Wejrowie

Przëbôcziwómë, że w kòżdi pòniedzôłk ò pòł piąti pò pôłnim są w Mùzeùm Kaszëbskò-Pòmòrsczi Pismieniznë i Mùzyczi we Wejrowie kùrsë tradicjowégò kaszëbsczégò tuńca, òb czas jaczich pòd òkã Jakùba Wałka mòżeta pòznac ùkładë, mùzykã i ritm.

Prowadzący dzejô w swiece tradicjowégò tuńca òd 2005 rokù, czej wëstãpòwôł w Karnie Piesnie i Tuńca „Kielce”. W latach 2006–2008 wëspółrobił z Kelecczim Teatrã Tuńca, a òd 2009 do 2013 rokù tańcowôł w Karnie Piesnie i Tuńca Gduńsczégò Ùniwersytetu „Jantar”. Dzysdnia je tancerzã Karna Piesnie i Tuńca „Lewino” z Lãbòrga. Wcyg mòżeta wësłac swòje zgłoszenié na adres: [email protected]

Naji knôpi. Dzeli naju apartnota kawlów?

Dlôcze wcyg mùszimë czëc ò nôrodny zdradze Pòmòrzanów na mòc wcelonëch òb czas II swiatowi wòjnë do Wehrmachtu? Je to ju téma blós dlô historików i mùzealników? Jak dzysdnia gadac ò ùszłoce? – prawie na ne pitania òdpòwiedzą 4 smùtana ò jednôsti do pôłniô w Eùropejsczim Centrum Solidarnoscë we Gduńskù paneliscë òb czas debatë.

W òbrëmim wëdarzenia wëstąpią dr hab. Sylwiô Bëkòwskô (historiczka, Institut Historie PAN), prof. dr hab. Cezari Òbracht-Prondzyńsczi (spòlëznowi antropolog, Gduńsczi Ùniwersytet) i dr hab. Waldémar Òssowsczi (archeòlog, direktór Mùzeùm Gduńska). Mòderatorã diskusje mdze prof. dr hab. Dariusz Filar (nôleżnik Programòwi Radzëznë KMO/ECS, Gduńsczi Ùniwesytet).

Wstãp je darmôk!

Pòtkanié namienioné ks. Kazmierzowi Raepke

Burméster Kartuz i Kaszëbsczé Mùzeùm miona Frãcëszka Trédra w Kartuzach rôczą na wspòminkòwé zéńdzenié namienioné ks. Kazmierzowi Raepke, aùtorowi pùblikacje „Kościół dawnej Kartuzji Kaszubskiej w Kartuzach”, chtërne mdze we czwiôrtk 6 smùtana ò piąti pò pôłnim w sedzbie kaszëbsczégò mùzeùm kòl sz. Kòscersczi 1.

Ò pòstacje kapłana òpòwié ks. prof. dr hab. Jarosłôw Babińsczi – czerownik stegnë sztôłceniô teòlogie w Doktorsczi Szkòle UKSW we Warszawie, wëkładówc Wëższégò Dëchòwnégò Seminarium w Pelplënie.

Wstãp je darmôk!

Ò Pòmòrsczi Zbrodnie w Somòninie

We czwiôrk 6 smùtana w Gminowim Òstrzódkù Kùlturë w Somòninie mdze aùtorsczé zéńdzenié z dr hab. Móniką Tomkewicz, wespółredaktórką pùblikacje pòd titlã „Zbrodnia pomorska 1939. Dokumentacja terroru niemieckiego. Tom 1”. Zôczątk pòtkaniô mdze ò szósti pò pôłnim, a òb czas niegò mdze lëżnota kùpieniô ksążczi w promòcjowim prizu.

W pùblikacje nalézesz dokùmentë z òpisënkã pòmòrsczi zbrodnie 1939 rokù, to je eksterminacje pòlsczégò cywilnégò lëdztwa, pacjentów psychiatrowëch bòlëców a żëdowsczi spòlëznë w òbrëmim 23 krézów przedwòjnowégò pòmòrsczégò wòjewództwa w pierszich miesącach miemiecczi òkùpacje. Pierszi tom tikô sã krézów: mòrsczégò (z krézã miesczim Gdiniô), kartësczégò, kòscersczégò, dërszewsczégò, stôrogardzczégò, swiecczégò, chònicczégò, tuchòlsczégò a sãpòleńsczégò.

Wstãp je darmôk!

Kònferencjô ò prof. Jerzim Sampie

W piątk 7 smùtana òd dzewiąti do pôłniô rôczimë na nôùkòwą kònferencjã pòd titlã „Jerzy Samp – Pomorze, Kaszuby, Gdańsk” sparłãczoną z ùroczëzną nadaniô miona jedny z aùli w bùdinkù Neòfilologicznégò Wëdzélu Gduńsczégò Ùniwersytetu a òdsłoniãcô pamiątkòwi tôflë namieniony profesorowi.

Òrganizatorama wëdarzeniô są Gduńsczi Ùniwersytet, Institut Klasycznëch Sztudiów a Slawisticzi, Zakłôd Slawisticzi i Słowiańsczich Sztudiów we wespółrobòce z Kaszëbskò-Pòmòrsczim Zrzeszenim. Hònorowi patronat nad ùroczëzną trzimają Prezydent Gduńska Aleksandra Dulkewicz i Marszôłk Pòmòrsczégò Wòjewództwa Mieczësłôw Struk

Program wëdarzeniô nalézesz na: https://www.kaszubi.pl/news/view/jerzy-samp--pomorze-kaszuby-gdansk

Pòtuńc w Serakòjcach

Gmina Serakòjce i Centrum Kùlturë w Serakòjcach sertno rôczą mieszkańców gminë i wszëtczich lubòtników kaszëbsczi tradicje na bëlné wëdarzenié, òb czas jaczégò bez czile jesennëch tidzeniów mdzemë razã òdkrëwac snôżotã naji kùlturë – ji mùzykã, legendë, jãzëk, film, teater a zwëczi.

W òbrëmim Jesennégò Festiwalu Kaszëbsczi Kùlturë 8 smùtana mdze „Kaszëbskô Trãptówka!”. Òd ósmi pò pôłnim mdzeta tańcowac w ritm kaszëbsczi mùzyczi, dzãka DJ Singòwi i Dãti Òrkestrze „A më jesmë naszi” z Przedkòwa.

Wiadła ò jinszich rozegracjach w òbrëmim projektu nalézesz na: https://fb.me/e/8cRNoW9KJ

Pòtkanié z Rómkã Drzéżdżonã w Jurace

Słowa, snôżi môl i żëwô kaszëbskô kùltura – czegò chcec wicy?

Kaszëbskò-Pòmòrsczé Zrzeszenié rôczi na pòstãpną edicjã projektu „Ogrody Literatury”, chtërna mdze 8 smùtana ò trzecy pò pôłnim w Szkòleniowò-Wëpòczinkòwim Òstrzôdkù Kaper w Jurace.

Tim razã pôgôdómë ò kaszëbsczim dolmaczenim w lëteraturze. Gòscã zéńdzeniô mdze Róman Drzéżdzón, a témą wëzwania i subtelnoscë w tłómaczenim tekstów na kaszëbsczi jãzëk na spòdlim ksążczi „Gwiôzdny knôp ë jinszé brawãdë”.

To bëlnô leżnosc, żebë òbzerac kaszëbiznã z perspektiwë słowa, szëkù i stilu, a téż pòczëc ò krëjamnotach robòtë dolmaczérë, jaką mô dbã, bë naja mòwa brzëmiała mòckò a snôżo.

Wstãp je darmôk!

Kòncert „Pùstô Noc”

Mùzeùm Westrzédnégò Pòmòrzô w Słëpskù rôczi na nadzwëkòwi wieczór fùl mùzyczi, refleksji i klimatu krëjamny kaszëbsczi nocë. W niedzelã 9 smùtana ò sódmi pò pôłnim w magiczny scenerie ricersczi zalë Zómkù Pòmòrsczich Ksążãtów w Słëpskù wëstąpi Aleksandra Kùtrzepa Quartet razã z Danielą Drążkòwską. Przed muzyczną czestą mdze prelekcjô dr. Łukasza Zołtkòwsczégò, chtëren wprowadzy naju w témã kaszëbsczégò zwëkù.

Przëszëkòwôł Paùel Wiczińsczi