Co? Dze? Czedë? [10-13.11]

Aùtorsczé pòtkanié z Szëmònã Grotã

W smùtanie i gòdnikù Samòrządowô Biblioteka w Żukòwie rëchtëje dlô lubòtników ksążków prôwdzëwie lëteracką czestã. W òbrëmim wëdarzeniô pòd titlã „Literacka jesień” mdze leżnosc pòtkac swòjich ùlubionëch pisarzów, zadac jima pitania ò jich ùtwórstwò, ùdbë na przińdnotã a dostac aùtograf na starnach jich dokazów. Kòżdi naléze cos dlô se, bò témë mdą tëkac wanogów, młodzëznowëch przigòdów, ògrodnictwa, zdrowiô a kriminalnëch historiów.

Wstãp je darmôk, le nót je sã rëchli zapisac – mailowò na promocja@bibliotekazukowo abò samémù w bibliotece.

Òsoblëwie rôczimë na pòtkanié z Szëmònã Grotã, aùtorã kriminału/horroru pòd titlã „Jo”, ò warszawsczim detektiwie Bòrisu Iwanicczim, chtëren przëbiwô do môłégò gardu na nordze Kaszëb, żebë rozpëzglëc sprawã bestialsczégò mòrdarstwa.

Wëdarzenié bãdze 12 smùtana ò szósti pò pôłnim w sedzbie biblioteczi kòl sz. 3 maja 3B.

Widzawiszcze „Welewetka”

Dwa lata nazôd czëtińcowie z całi Pòlsczi mielë leżnosc pòznac historiã a dzysdniowòsc Kaszub w pòzdrzatkù gazétnicczi Staszë Bùdzysz, jakô ùsôdzëła ksążkã „Welewetka. Jak znikają Kaszuby”. Dzãka bëlny promòcyjny akcje wëdowiznë i sami aùtórczi trafiła òna do rãków wiele lubòtników repòrtażu i miała cësk na diskùsjã wkół pòrëszonëch w ni drãdżich témów naji spòlëznë.

Ksążka to le nié jedurny ôrt, na jaczi zamkłosc pùblikacje mdze rozkòscérzónô, bò òstôł przërëchtowóny nowi bédënk w pòstacje teatrowégò projektu. Pòwstało widzawiszcze, jaczé mòżeta òbzerac darmôk w Kartësczim Centrum Kùlturë (sz. Klasztornô 1) 12 smùtana ò szósti pò pôłnim, 13 smùtana ò pierszi pò pôłnim (namienioné szkòłowim karnóm) i ò szósti pò pôłnim.

Bilietë mòże òdbierac w kase Kina Kartuzë. Wicy wiadłów pòd numrã: 506 590 022.

Nowô ksążka ò patronach zdrowiégò

Nôùkòwô wëdowizna Pòmòrsczégò Ùniwersytetu w Słëpskù i Mùzeùm Kaszëbskò-Pòmòrsczi Pismieniznë i Mùzyczi we Wejrowie rôczą na promòcjã mònograficznégò wieleaùtorsczégò dokazu pòd redakcją prof. Adelë Kùik-Kalinowsczi pòd titlã „Św. Rozalia i św. Roch. Patroni zdrowia – święci od zarazy”.

Zéńdzenie mdze 12 smùtana ò piąti pò pôłnim w ksążnicë prof. Gerata Labùdë we Wejrowie (sz. Zómkòwô 2).

Pùblikacjô je brzadã IV sympòzjum z cyklu „Chrześcijaństwo na Pomorzu. Kultura duchowa i materialna” i pòkazëje znaczënk kùltu sw. Rozalie z Palermo i sw. Rocha z Montpellier, òsoblëwie żëwégò na Pòmòrzu a Kaszëbach.

Michał Mòga i jegò recital

Młodzëznowô miłlota do kaszëbiznë wëfùluje mùzyką i pòezją rum pòdzemiów gimnazjalnégò kòscoła w Chònicach. Michôł Mòga rôczi na swój recital, jaczi mdze pòdrechòwanim jegò 10-latnégò artisticznégò ùróbkù. W òbrëmim kòncertu ùczëjemë wiérztë a frantówczi, jaczé młodi artista prezentowôł na kaszëbsczich kònkùrsach a pòmòrsczich binach. 14 smùtana ò szósti pò pôłnim żdają naju zagrańcowé a pòlsczé szlagrë w kaszëbsczim tłómaczenim, a téż pòlsczé i kaszëbsczé frantówczi w nowëch aranżacjach.

Wstãp darmôk!

„Tryptyk Kaszubski”

W miono òrganizatorów rôczimë 14 smùtana ò szósti pò pôłnim do Centrum sw. Jana we Gduńskù, gdze mdze kòncert pòd titlã „Tryptyk Kaszubski – legenda, miłość, narodziny”.

Na mùzyczną rozegracjã skłôdają sã dokazë aùtorstwa Mateùsza Rëczka na òbsztelënk  Gminowégò Òstrzódka Kùlturë, Spòrtu i Rekreacje w Chmielnie: spiéwòjigra „Zómk w dôce”, kantata „Remùsowô Miłota” i Môłé Kaszëbsczé Òratorium „Apokalipsa”. Spòdlim dzéla prezentowónëch piesniów je kaszëbskô epòpeja aùtorstwa Aleksandra Majkòwsczégò „Żëcé i przigòdë Remùsa”. W Òratorium są wëjimczi Apòkalipsë sw. Jana w dolmaczenim z grecczégò na kaszëbsczi jãzëk aùtorstwa ò. Adama Sykòrë. W kantace ùtwórcë wëzwëskelë kaszëbską pòezjã Hanë Makùrôt-Snuzyk.

Bilietë mòże kùpic na: https://tiny.pl/99z9c6t2

Widzawiszcze „Wanożnice”

„Wanożnice” to diplomòwë widzawiszcze sztudérów a sztudérków IV rokù Wòkalno-Aktorsczégò Sztudium m. Danutë Baduszkòwi. Reżisérka Katarzëna Szëngier z leżnoscë roczëznë 100-lecô gardu Gdiniô wëbrała jakno spòdle dokazu Kaszëbë.

We widzawiszczu karno sztudérów teatrowi szkòłë zarô pò zdónëch egzaminach jedze na Kaszëbë pòd celt, żebë fejrowac zôczątk latnëch feriów. Rozpôlają ògniszcze, jidą Mòrë… Co mdą chcałë rzec jima kaszëbsczé dëchë a ùkôzczi? Jak skùńczi sã to niecodniowé pòtkanié?

Mùzyczné widzawiszcze je ùsôdzoné na spòdlim frantówków Òla Walicczégò, aùtora albùmów „Kaszëbë” i „Kaszëbë II”. Widzawiszcze mòże òbzerac w Mùzycznym Teatrze m. D. Baduszkòwi w dniach 11,17,18 a 19 smùtana. Nôblëższé wëdarzenié ju we wtórk ò sódmi pò pôłnim.

Rôczimë do kùpiwaniô bilietów, bò chùtkò dżiną!

https://biletyna.pl/spektakl/WANOZNICE

XI Pelplińsczi Areòpag

Latosô edicjô Pelplińsczégò Areòpagù namienionô mdze témie dzysdniowégò kùńsztu na Pòmòrzim. Wëdarzenié mdze 15 smùtana òd dzesąti do pôłniô w Diecezjalny Bibliotece w Pelplinie.

Òrganizatorama kònferencje są: Kaszëbskò-Pòmòrsczé Zrzeszenié, Diecezjalnô Pelplińskô Kùriô i Teòlogiczny Wëdzél Ùniwersytetu Mikòłaja Kòpernika w Torniu.

Hònorowi Patronat nad wëdarzenim trzimô Pelpińsczi Biskùp dr Riszôrd Kasyna a Marszôłk Pòmòrsczégò Wòjewództwa Mieczësłôw Struk.

Program nalézesz na: https://www.kaszubi.pl/news/view/xi-areopag-pelplinski---wspolczesna-sztuka-na-pomorzu

45-lecé karna „Sierakowice”

Kaszëbsczé karno piesnie i tuńca „Sierakowice” fejrëje 45 lat dzejaniô fùl pasje, miłotë i dbë ò promòcjã i rozkòscérzanié kaszëbsczi kùlturë i tradicje.

Karno rôczi na wëjątkòwi jëbleùszowi kòncert, jaczi bãdze 16 smùtana ò czwiôrti pò pôłnim w Centrum Kùlturë w Serakòjcach. Na binie ùczëjëmë dzysdniowëch a ùszłëch nôleżników i nôlëżniczczi serakòjsczi grëpë.

Wëdarzenié nie mdze blós mùzyczną czestą, le téż leżnoscą do pòdrechòwaniô wnetka pòł stalata robòtë nad ùchòwanim kaszëbsczi juwernotë regionu.

Bilietë sã za darmôka, le nót je òdebrac w biórze Centrum Kùlturë w Serakòjcach.