Reklama

Brëkòwné dëtczi i wiérztë

Klëka

13/10/2025 13:17

Òdj. facebookòwô starna Ùtzãdu Miasta w Dërszewie

Pòecë z Dërszewa i òkòlégò mògą wparłãczëc sã w akcjã sfinancowaniô pòmòcowi kawnico-ksążnicë przez przesłanié swòjégò dokazu, a wszëtcë jinszi mògą pòmòc wpłatą na internetową zrzutkã.

Spòlëznowi dzejôrz i pedagóg Kristión Òstrowsczi z Dërszewa chce stwòrzec w gardze òsoblëwą kawnico-ksążnicã ò pòzwie "Niebò na Rogù". Kawa czë arbata mò bëc tam pòdôwónô za wòlné datczi, wszëtkò co òstónie pò òpłacenim rechùnków mô trafiac na biédnëch, gòsce bãdą mòglë rechòwac na pòmòc dëchòwą, psychòlogiczną i fizyczną, a mô to bëc téż plac kùlturowëch i lëteracczich.pòtkaniów. „To bãdze plac fùl miłoscë, Ewanieliô w praktice. Dlô kòżdégò, nie zdrzącë na to, kògùm të jes” – pòdrechòwiwô ùdbòdôwôcz na profilu internetowi zbiérczi na ùsadzenié placu. Òkróm dëtków Kristión Òstrowsczi chce téż zbierac wiérztë. Wëdóné mają bëc òne w pòeticczim tomikù, gdze kòżdi zgłôszający bãdze miôł wëdrëkòwóny jeden dokôz. Dëtczi z przedażë ksążczi mają pòmòc w sfinancowanim Nieba na Rogù. Szukóny są pòecë z Dërszewa i òkòlégò, a akcjã wëdaniô tomikù wspiérô prezydent Dërszewa Łukôsz Brządkòwsczi, Mieskô Pùblicznô Bibloteka miona Aleksandra Skùlteta w Dërszewie i dërszewsczé Centrum Kùlturë i Kùńsztu. Chãtny ùsôdzcë mùszą wësłac maila z wiérztą na adresã [email protected], w titlu wpiséwającë „WIERSZE POETÓW TCZEWSKICH” i pòdôwającë swòje miono i nôzwëskò.

H.S.Sz.

Załączniki