W pòdjimniãcé zabédowóné przez gminné wãdkarsczé kòło włącził sã samòrząd, lokalné òrganizacje i pòdjimarze. Nót je jesz chãtnëch do pòmòcë w akcje.
Na òglowim zéńdzenim Kòła Pòlsczégò Wãdkarsczégò Związkù „Lëpiéń” z gminë Czôrnô Dąbrówka z inicjatiwë przédnika kòła Andrzeja Duszkewicza pòdjimniãtô òstała decyzjô ò zòrganizowanim akcje sprzątaniô rzéczi Łëpawë, chtërna wëpłiwô z jezora Jaséń i ùchôdô do Bôłtu w Rowach. Akcjô òstała zaplanowónô na sobòtã dwadzestégò drëdżégò strëmiannika. Pòmòc w òrganizacje zadeklarowałë ju gmina Czôrnô Dąbrówka, gmina Pòtãgòwò, Nadlesyństwò Łëpawa, Lokalnô Turisticznô Òrganizacjô Lãbòrskô Zemia – Łeba a téż firma FAMILYday z Céwiców, jakô przërëchtëje kajaczi dlô ùczãstników wëdarzeniô. Òrganizatorzë zachãcywają do pòmòcë w akcje. W dzéń sprzątaniô mô bëc zbiérka ò ósmi gòdzënie kòl szkòłë w Czôrny Dąbrówce. Karno wòlontariuszów dô sã na sprzątanié kòl dwadzesce piãc kilométrów rzéczi, midzë môlëznama Kòzëno a Łëpawa. Nót je przińc w òblëczënkù do brëdaniô w wòdze. Miechë na smiecë i rãkawiczczi zagwësnią òrganizatorzë. Pò sprzątanim rôczą na pòspólné ògniszcze z wôrztama. H.S.Sz.
Twoje zdanie jest ważne jednak nie może ranić innych osób lub grup.
Komentarze opinie