Reklama

Òbstawilë fligrë i kôzelë sã zabrac do Albanie

Klëka

08/01/2026 14:46

Tirana. Òdj. Albinfo; zdrzódło: https://pl.wikipedia.org/wiki/Tirana#/media/Plik:Tirana_from_South.jpg

Latawnô liniô nie dała pasażéróm wiadë, dlôcze jich fligrë zawrócëłë znad albańsczégò nieba. Do protestëjącëch wezwóny bëlë szandarzë.

W nocë ze wtórkù szóstégò na strzodã sódmégò stëcznika dwa fligrë lecałë z Bergamò i Bòlonie w Italsce do albańsczi stolëcë, Tiranë. Wikszosc pasażérów to bëlë Albańczicë. Czedë fligrë nalazłë sã w albańsczi niebny òbéńdze, przez czile gòdzyn ni mògłë wëlądowac przez lëché wiodro. Czedë niwle òpału we fligrach bëłë ju nisczé, pilocë zawrócëlë je do Italsczi. Wëlądowałë na latawiszczu Brindisi. Tam równak przewòznik nie dôł wnet sztëresta pasażéróm rzetelny wiadë, dlôcze jesz nie są w Tiranie. Dzél z nich przebił sã przez kòntrolã bezpiekù, pònëkôł na platã latawiszcza i òbtocził òba fligrë. Domôgelë sã transpòrtu do Albanie. Òbsada fligerplacu wezwała pòlicjã, karabiniérów i skarbòwą starżã. Szczestlëwie nie doszło do niżódnëch aktów agresje midzë pasażérama a szandarama. Albańczicë òstelë pòinfòrmòwóny ò lëchim wiodrze. Dostelë téż bédënk, że aùtokarama mògą jich przewiezc na rzimsczé latawiszcze Fiumicino, skąd pòlecą do Tiranë, na co niechtërny sã zgòdzëlë. Fligerplac w Brindisi dôł do wiadë, że protest nie sprawił òpózdnieniów jinym lecbóm.

H.S.Sz.

Załączniki