Reklama

Bôt z 31 pasażérama wëwrócył sã na Czerwionym Mòrzu

Klëka

27/11/2024 15:57

Strzód pasażérów bëlë pòdwòdnicë z Eùropë, Chinów i Zjednónëch Stanów. Bôt miôł zabrac jich na òbzéranié pòdwòdnëch rafów.

W pòniedzôłk 25. smùtana kòl gòdz. 5:30 môlowégò czasu kòl rafë Sataya na Czerwionym Mòrzu, niedalek egipsczégò pòrtu Marsa Alam wëwrócył sã pasażérsczi bôt „Sea Story”, na jaczim bëło 31 pasażérów rozmajiti nôrodnoscë i 13 nôleżników òbsadë. Bôt òstôł wëwrócony przez bôłdëjącé dënëdżi przë wietrze ò chùtkòscë 34 wãzłów, jaczé doprowadzëłë do jegò zatoniãcô w 5–7 minut. Òkrãt wëjachôł w niedzelã z môlëznë Port Ghalib i pò piãc dniach miôł przëpłënąc do Hurghadë. Pasażérama bëło midzënôrodné karno pòdwòdników, jaczi colemało rézëją pò Czerwionym Mòrzu żebë norzëc kòl jegò rafów.

Ùdało sã ùretac 33 lëdzy. Retownicë nalezlë téż 4 cała, a za négą dali szukają.

Reklama

Jak pòdôwô gùbernatór egipsczi prowincje Czerwionégò Mòrza Amr Hanafi, bôt słëchający do òbëwatela Egiptu miôł slédną kòntrolã latos w strëmiannikù i béł tedë w dobri techniczny stojiznie. Môlowé służbë zbadérëją, dlôcze dënëga doprowadzëła do skażeniô òkrãtu.

H.S.Sz.

Czytaj nas w Google

Dodaj do Google

Źródło i opracowanie własne