Gazétniczka Wiktoriô Roszczina mògła ùmrzéc w rusczi niewòlë przez brutalné traktowanié – tak cwierdzą ùkrajińsczé służbë, chtërne zbadérowałë ji cało.
Ùkrajińskô prokùratura pòdała do pùbliczny wiadë wëniczi badérowaniô cała dwadzescesétmëlatny Wiktorie Roszczinë, gazétniczczi pòrwóny dwa lata nazôd w zélnikù przez rusczé służbë. Roszczina zajimała sã ùdzélã rusczi Federalny Służbë Bezpiekù w pòrwaniach w òbéńdze Zapòriżégò. Ji kawel długò nie béł znóny. Pò dzewiãc miesącach Ruscë przëznelë, że gazétniczka òstała aresztowónô, a rok pò pòjimanim pòzwòlëlë ji na telefòniczny kòntakt z rodzëzną. Za dwa miesące rodzëzna dostała lëst, w jaczim rusczé Ministerstwò Òbarnë pòjinfòrmòwało ò smiercë białczi w séwnikù. Ji cało wrócëło do Ùkrajinë latos w gromicznikù razã z całama sétmëset piãcdzesąt szesc jinszich Ùkrajińców, jaczi ùmerlë w rusczich sôdzach. Bëła włożonô w miech z pòdpisënkã, wskazéjącym, że bënë je niezidentifikòwóny chłop. Na samim cele bëła równak òpaska pòcwierdzywającô juwernotã Wiktorie Roszczinë, a geneticzné badérowania dałe gwësnosc. Ù białczi nalezlë trójné òcarca, wëlewë krëwie w rozmajitëch partach cała, złómóné żebro, ùszkòdë szëji i szlachë rażeniô elektricznym sztrómã. Maklewny przëczënë smiercë nie ùdało sã wëkrëc, bò cało miało rëmniãti mùsk, òczë i gôrdzel. Wëcynanié narządów Ruscë tłómaczą procedurama zajimaniô sã całama ùmarłëch. Wedle prokùratorów Roszczina bëła w sôdzë torturowónô, szlachòwno jak wiele jinszich pòrwónëch i pòjimónëch przez Rusków òd zôczątkù wòjnë na Ùkrajinie.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie