Reklama

Chcelë ùsmiercëc prezydenta czarama

Klëka

16/09/2025 10:06

Hakainde Hichilema. Zdrzódło: https://pl.wikipedia.org/wiki/Hakainde_Hichilema#/media/Plik:Visit_of_President_of_Zambia.jpg

Czarzbònów miôł najic ùszłi pòsélc. Prezydent Hakainde Hichelima nie skòmentowôł sprawë – sóm w czarë nie wierzi.

Zambijsczi sąd skôzôł dwùch chłopów z Zambie i Mòzambikù na dwa lata sôdzë za próbã zabicô prezydenta Hakainde Hichilemë, jak docygają pòdszukòwny, na zlecenié jednégò ùszłégò pòsélca, jaczi terô sã ùkriwô przed szandarama. Mielë to zrobic z ùżëcym dwùch talizmanów i żëwégò kameléòna w czarzëcélsczim rituale. Zatrzimóny z zôczątkù cwierdzëlë że są leno zwëczajnyma gòjcama i praktikùją tradicjową medicynã, ale w kùńcu przëznelë, że kameléònowi chcelë òdcyc ògón i ùżëc w rituale, jaczi miôł doprowadzëc do smiercë prezydenta w piãc dni. Òbarnie dwùch chłopów nie ùdało sã wëbiôtkòwac dlô nich dëtkòwi sztrôfë. Béł to pierszi proces w Zambie, w jaczim sądzoné bëło brëkòwanié czarzbë procëm głowie państwa. Sąd pòdczorchnął, że nie rozwôżô tegò, czë chtos mô abò ni mô czarzëcélsczich mòców, ale czë sóm sã pòdôwô za czarzbóna i tak mani lëdzy abò robi nieùbëtk w spòlëznie. Sóm ùstôw ò czarzbie, w jaczim są zapisënczi téż ò sztrôfny òdpòwiedzalnoce, je w mòcë òd kòlonialnégò cządu. Jegò zamësłã bëło przekôzanié procesów ò czarë w rãce państwòwëch sądów, bò bez tegò lëdze bëlë rãdi sami wëmierzac sprawiedlëwòsc na przëmiar starszim białkóm niesłëszno winowónym ò czarzenié.

H.S.Sz.