Reklama

Chcelë złożëc turistã w òfierze na piramidze Kùkùlkana

Klëka

27/03/2025 19:15

https://pl.wikipedia.org/wiki/Chich%C3%A9n_Itz%C3%A1#/media/Plik:El_Castillo_Stitch_2008_Edit_1.jpg

Trzëdzescëòsmëlatny Niemc nielegalno wszedł na piramidã Majów. Pòlała sã jegò krew.

We czwiôrtk dwadzestégò pierszégò strëmiannika jak co rok z leżnoscë zymkòwi równonocë wiele turistów przëszło òbzerac piramidã bòga Kùkùlkana zwóną téż Zómkã w Chicén Itzá, rëjnach gardu Majów na półòstrowie Jukatan w Meksykù. Jidze tedë òbaczëc na scanie piramidë céń w sztôłce wãża, symbòlu bòga Kùkùlkana. Latos spòmidzë turistów wërwôł sã równak jeden trzëdzescë òsmë lat stôri Niemc, jaczi òminął òchrónã zabëtkù i zaczął wchadac pò trapach na wëszińc piramidë, co je zakôzóné prawã. Gòniony przez òchrónã, próbòwôł schòwac sã bënë, ale stamtądka òstôł wëcygłi i scygniãti na dół. Rzma lëdztwa, jakô òbzérała jegò wëczënë na dole, bleczała na niegò rozprzeniosłô, a czej ju béł nazôd na zemi, zaatakòwała turistã. Òstôł zreniony do krëwi w łësënã, ale nick pòwôżniészégò mù sã nie stało. Czej òchróniarze òdprowôdzelë gò z placu, néga turistów wëkrzëkiwała, że nót bë Niemca złożëc w òfierze, tak jak to robilë Majowie dlô swòjich bògów. Szandarzë nie przëjãlë tegò bédënkù. Nôgwësni turista zapłacy za swòje rojberstwò blós dëtkòwą sztrôfã.

H.S.Sz.

Czytaj nas w Google

Dodaj do Google

Źródło i opracowanie własne