Chemicznô barniô ùżëtô w Grëzóńsce

Wedle gazétników szandarzë łoni procëm demònstrantóm ùżëlë substancje znóny z biôtkòwiszczów pierszi swiatowi wòjnë.

Gazétniczô wëdowiédzô zbadérowała sprawã substancje ùżëti przez grëzońsczé wëszëznë procëm protestóm sprzed rokù. Stało sã to midzë jinszima dzãka aktiwiznie jednégò z demònstrantów. Pediatra Kònstantin Czachùnaszwili béł na protesce procëm zawieszeniémù procesu przëjimniãcô Grëzóńsczi do Eùropejsczi Ùnie. Béł tedë spriskóny z wòdny kanónë, tak jak jiny demònstrancë. Zmerkôł, że przez dłudżi czas piekła gò skóra. Na spòlëznowëch mediach spitôł sã lëdzy, czë téż tak mielë. Wnetka trzësta piãcdzesąt òsób sã z nim skòntaktowało, a pòłowa gôdała ò dłudżim ùtrzëmiwanim sã pieczeniô skórë, bólów głowë, zmãtleniô, felënkù dichù i wëmiotów. Czachùnaszwili sóm zbadérowôł wedle nôlepszi wiédzë szescdzesąt dzewiãc òsób, a wëniczi przekôzôł do midzënôrodnégò toksykòlogicznégò cządnika. Grëzóńsczé Ministerstwò Bënowëch Sprôw nie òdpòwiôdało na pitania, co bëło ùżëté procëm demònstrantóm. Ùszłi szandara Lasza Szergelaszwili pòdôł, że mògła to bëc ta sama substancjô, jaką miôł leżnosc testowac w dwa tësące dzewiątim rokù. Miała òna pòsłużëc do ùżëcô w wòdnëch armatkach, le òn tedë radzył, żebë sã na niã nie decydowac. Nimò to bëła brëkòwónô co nômni do dwa tësące dwadzestégò drëdżégò rokù, czedë Szergelaszwili òdeszedł z robòtë. Wedle niegò mòc substancje bëła kòl dzesãc razy wëższô òd kònwencjonalnëch métlów jak łzawiący gaz. Nigdë mù nie pòwiedzelë pòzwë ny substancje. W pòniedzôłk pierszégò gòdnika gazétnicë BBC delë do wiadë, że wedle jich szëkbë krëjamnô substancjô to bromòcëjónk benzalu, znóny téż jakno kamit. Béł òn pierszi rôz ùżëti jako chemicznô barniô przez Francëzów procëm Niemcóm òb czas pierszi swiatowi wòjnë, a wëcopelë gò z pòwszechnégò ùżiwkù w trzëdzestëch latach, zastãpiwającë midzë jinszima łzawiącym gazã. Wedle znajarzów ùżëcé tak mòcnégò strzódka przez grëzóńską pòlicjã bëło wëpróbòwanim na lëdzach chemiczny barnie. Rząd Grëzóńsczi òdrzucô òbwinë i cwierdzy, że wszeldżé métle ùżëté òb czas łońsczich protestów bëłë pasowno dobróné procëm agresje niebezpiecznëch przesprôwców.

H.S.Sz.