Reklama
Chińczicë pòkòchelë smùtnégò kònia
29/01/2026 13:52
Przez felã robòtnika fabriczi do przedażë weszłë bawidła z gãbą naszëtą na òpôk. Dlô miéwcczi fabriczi bëła to zwënéga.
Latos sétmënôstégò gromicznika Chińczicë fejrëją nowi rok. W przërëchtowanim na ten dzéń fabriczi ju produkùją zachë z mòtiwã ògnistégò kònia – bôłdzowò-zwierzëcym symbòlã nadchôdającégò rokù. Szlachòwną seriã pliszewëch czerwionëch kòników wëpùscëła fabrika dzejającô w hańdlowim gardze dlô môłëch geszeftów Yiwù. Pierszé partie schôdałë z tasmów òd rujana, ale zainteresowanié kònikã za dwadzesce piãc juanów bëło strzédné – òb dzéń przedôwało sã kòl sztërësta sztëk. Wszëtkò sã zmieniło w tim miesącu, czej jeden z internaùtów wstawił do sécë òdjimk bawidła z felny partie. Przez błąd robòtnika gãba pluszôka bëła naszëtô na òpôk, przez co kóń dostôł smùtnégò wëzdrzatkù. Chòc miéwcka fabriczi Zhang Huoqing dorazu chcała sã z nim skòntaktowac, żebë zabédowac zwrot dëtków za bawidło, chùtkò sã òkôzało, że internaùtóm smùtny kóń sã ùwidzôł. Huoqing zaczãła dostawac prosbë ò zwikszenié produkcje smùtnëch kòniów. Fabrika ùrëszniła dzesãc dodôwkòwëch produkcjowëch liniów i dostôwô dzesątczi tësący zamówieniów na dzéń. Bismónka nie dała do wiadë, chtëren z ji robòtników zrobił felã, ale zapòwiedzała że całé produkcjowé karno dostónie nôdgroda. Smùtnégò kònia pòkòchelë przede wszëtczim młodi Chińczicë, jaczi w Internece piselë, że jegò gãba dobrze òddôwô jich bënowi ùstôw, czedë są w robòce. Tak łôtwi jim bëło sã do bawidła przërzeszëc i doznac jaczi pòcechë, czej na niegò zdrzą.
H.S.Sz.
Reklama
Komentarze opinie
Podziel się swoją opinią
Twoje zdanie jest ważne jednak nie może ranić innych osób lub grup.
Reklama
Wideo
Reklama
Komentarze