Reklama

Chińskô delegacjô w sprawie atakù na niemòwlã

Klëka

30/01/2026 12:45

Ze swiata, Chińskô delegacjô sprawie atakù niemòwlã - zdjęcie, fotografia

Chłop z Aùstralie chilnął kawą na dzeckò i zwiornął do Chin. Je mòżebnosc, że òdpòwié za to wedle chińsczégò prawa.

W lato dwa tësące dwadzestégò czwiôrtégò rokù w miesczim parkù w Brisbane w Aùstralie doszło do atakù na niemòwlã. Trzëdzescëtrzëlatny chłop chilnął gòrącą kawã z termòsa na dzewiãcmiesãcznégò knôpiczka, jaczégò rodzëzna bëła na piknikù. Starszi òpiselë zdarzenié jakno ùmëslny atak. Sprôwca zwiornął z parkù, a pòlicje nie ùdało sã gò złapac. Pòlecôł fligrã do Chin. Stamtądka nie szło gò scygnąc, bò Chinë i Aùstraliô ni mają pòdpisóné ùgôdënkù ò ekstradicje. Terô równak w czwiôrtk dwadzestégò dzewiątégò stëcznika ambasadór Chin w Aùstralie Xiao Qian dôł do wiadë, że do Aùstralie òstelë wësłóny chińsczi szandarzë. Jich delegacjô mô sã zetkac z szandarama z Brisbane i dokładno pòznac akta sprawë. Na tim spòdlim zdecydëją, co zrobic z atakòwnikã, jaczi wcyg mieszkô w Chinach. Je mòżebné òbsądzenié gò i wëmierzenié mù sztrôfë na tamecznëch warënkach. Wedle aùstralijsczégò prawa za ten atak sprôwcë grozëłabë nawet dosmiertnô sôdza, ale w Chinach téż sztrôfa smiercë. Ò atakòwnikù je pùbliczno wiedzec, że przed atakã przez szesc lat czãsto wanożił pò Aùstralie, jimającë sã rozmajitëch robòtów. Sama jegò òfiara czëje sã ju dzysdnia dobrze. Na òperacje skórë òfiarë bëła ùrësznionô internetowô zbiórka. Lëdze pòwpłacywelë na niã dwasta trzëdzescë tësący aùstralijsczich dolarów, to je równoznaczënã piãcset szescdzescąt òsmë tësący złotëch. Knôpòwi òstałë szlachë pò òparzeniach na bardze i remieniu.

Źródło i opracowanie własne