Co zrobic, jak pò Gòdach òstało jestkù?

Spòlëznowé lodownice mògą bëc ùdbą na to, jak nie zmarnowac ùwarzonégò na swiãta jestkù, jaczégò sami nie dómë radë zjesc.

Z leżnoscë Gòdów wôrt je dac bôczenié na tôczel marnowaniô jestkù, chtërnégò colemało òstôwô pò swiãtach dosc tëli, co jedna rodzëzna nie dô radë dojesc. To je mòżebnosc òddaniô zbiwającëch môltëchów do spòlëznowëch lodowniców, skądka pòtemù brëkùjący lëdze bãdą mòglë wzyc sobie cos do jedzeniô. Òsoblëwie òb zëmã je to szansa dlô lëdzy bez dodomù abò sómnëch na to, bë sã pòdkarsznic tim, czegò chtos jiny ju jôdł nie bãdze.
Do spòlëznowëch lodowniców je nót òddawac casno zapakòwóné produktë i môltëchë. Żelë nie są w òriginalnym òpakòwanim, je nót przërëchtowac òpisënk òddôwónégò môltëchù razã z datą przërëchtowaniô, tak żebë lëdze, co bierzą jestkù z lodowniców, mielë swiądã co je w zabiérnikù. Ni mòże òddawac môltëchów z sërim miãsã czë sërima jajama ani alkòholu.
Hewò lësta spòlëznowëch lodowniców przistãpnëch w pòmòrsczim wòjewództwie razã z adresama:
- Chònice, sz. Òbróńców Chòniców 4 kòl parafie Matczi Bòsczi Królewi Pòlsczi
- Dërszewò, sz. Krótkô 9-10
- Gdiniô, sz. płk. Dąbka 207
- Gdiniô, sz. Gòrczëcowô
- Gdiniô, sz. Kòrnela Ùjejsczégò kòl parafie sw. Antóna
- Gduńsk, sz. Pańskô kòl kòscoła sw. Mikòłaja
- Gduńsk, sz. Mickewicza 11 kòl parafie Swiãtégò Krziża
- Gduńsk, sz. Òpata Rëbińsczégò 10
- Gduńsk, sz. Jachtarskô (Myśliwska) 25
- Kòscérzna, sz. Targòwô
- Lãbórg, sz. Kòssaka 3
- Malbórg, sz. Józefa Wëbicczégò 2 w kaplëcë parafie sw. Ùrszulë Ledóchòwsczi
- Miastkò, sz. Juliana Tuwima 1 kòl Òstrzódka Spòlëznowi Òpieczi
- Pruszcz Gduńsczi, sz. Pòlsczégò Wòjska 5
- Rëmiô, sz. Dąbrowsczégò kòl Karna Salezjańsczich Szkòłów
- Słëpsk, sz. Jarôcza
- Sopòt, sz. 3. Maja 18
- Wejrowò, sz. Kòscuszczi 2 kòl parafie Swiãti Trójcë.