Córka prezydenta z òbwinama ò terrorizm

Òbwinë są òpiarté ò dwa pòstë w spòlëznowëch mediach, jaczé prokùratura òdebrała jakno wezwã do terrorizmù. Duduzile Zuma-Sambùdla protestowała tedë procëm aresztowi dlô swòjégò òjca.

W Repùblice Pôłniowi Africzi rëgnął proces sztërdzescë trzë lata stôri Duduzile Zumë-Sambùdlë, córczi ùszłégò prezydenta Jacoba Zumë. Prezydent zeszedł z ùrzãdu w dwa tësące òsmënôstim rokù westrzód wielnëch òbskôrżeniów ò kòrupcjã. W dwa tësące dwadzestim pierszim rokù nie stawił sã w sądze na procesu w ti sprawie, a dlôte òstôł aresztowóny. Prawie tedë wëbùchła stolëmnô rëchawa, taksowónô jakno nôgòrszi pòkôzk przemòdżi òd zôczątkù demòkraticznégò cządu w Pôłniowi Africe, to je òd tësąc dzewiãcset dzewiãcdzesątégò czwiôrtégò rokù. W prowincjach KwaZulu-Natal i Gaùteng przez tidzéń panowała prakticznô anarchiô, trzësta òsób zdżinãło, a stratë są taksowóné na równoznaczënã dwùch miliardów òsmëset miliónów dolarów. Wedle prokùraturë córka ùsadzonégò prezydenta przëczëniła sã do pòdskaceniô ti rëchawë. Na Twitterze ùprzëstãpniwała òdjimczi ë nagrania zniszczeniów w gardach. W jednym z Tweetów pòkôzała żôlący sã transpòrter z aùtołama kòl gardu Mooi River w prowincje KwaZulu-Natal, ùżëła hashtagù „#FreeJacobZuma” (Ùwòlnic Jacoba Zumã) a téż słowa „Amandla!”, pò zuluskù „Dôga!” – je to zéwiszcze z czasów biôtczi z apartheidã. W jinszim ùprzëstãpniła plakat wzéwający do blokadë dróg, fabrików, krómów i rządowëch bùdinków i dodała słowò „Azishe!”, co pò zuluskù mòże znaczëc dosłowno „Niech to zapłonie!”, ale slangòwò mòże téż znaczëc „Niech sã zacznie!” abò „Niech to jidze dali!”. Na tim spòdlim prokùratura winëje Duduzile Zumã-Sambùdlã ò nawòłiwanié do terrorizmù. Cwierdzy, że te wiadë miałë na célu pòdskacëc ji sto tësący òbzérającëch do przëparłãczeniô sã do wałë przemòdżi. Białka sã z tim nie zgòdzëła i do sądu na zôczątk procesu przëszła w kòszulce z wëszczérzającym nôdpisã „Mòdernô terroristka”.

H.S.Sz.