W nowò òdemkłim parkù dzecë fejrowałë swój dzéń, a chãtny ùstny mòglë sã doznac wszëtczégò ò zastãpczich rodzëznach.
W sobòta trzëdzestégò pierszégò maja w Kòscérznie prze szasëje Ósmégò Strëmiannika òficjalno òdemkłi òstôł nowi miesczi park. Wëdarzenié bëło sparłãczoné z fejrowanim Kòscérsczégò Dnia Dzecka i Zastãpczi Rodzëznë. Na terenie parkù je skatepark, plac zôbawów, bùtnowô mòcowniô, stegnë tak dlô pieszich jak dlô kòłów i kùlôków, conë wëpòczinkù czë place do grë w fùsbalã, kòszową balã i tenysa. Przódë plac béł mòckò zapòmòrszczony i niechãtno òdwiédzóny przez mieszkańców, ale inwesticjô za sztërë i pół milióna złotëch pòzwòlëła na mòdernizacjã terenu. Bëtny na òdemkniãcym i na Dniu Dzecka mielë szansã òbezdrzec artisticzné wëstãpë dlô dzecy, w tim dzecny sekcje Kaszëbsczégò Karna Piesnie i Tuńca „Kòscérzna”, a téż wzyc ùdzél w kònkùrsach, warkòwniach i animacjach. Òb wëdarzenié w parkù dzejôł téż infòrmacjowi pùnkt Krézowégò Centrum Pòmòcë Rodzëznie w Kòscérznie, gdze chãtny mòglë sã doznac jak ùsadzëc zastãpczą rodzëznã.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie