Jeden z nôsłôwniészich kòscołów swiata òdmikô sã pò piãc latach robòtów nad ùprawienim skùtków ògnia. Ceremóniô zebrała gòscy ze wszëtczich kòntinentów.
W sobòtã 7. gòdnika wieczór katédra Notre-Dame w Parizu òstała zôs òdemkłô òb czas ùroczëznë z ùdzélã gòscy z całégò swiata. Pò ògniu, jaczi spôlił kòscół w 2019 rokù òdbùdowa dérowała 5 lat i kòształa 700 mln eùro a téż robòtã wicy jak 2 tës. znajarzów architekturë i kùńsztu, rzemiãsników i robòtników. Brzôd jich robòtë mòglë òbzerac ùczãstnicë ceremónie òdemkniãcô z ùdzélã przedstôwców kòscelnëch wëszëznów, pòlitików i artistów.
Gòscama przëjachónyma do Pariza bëlë m.jin. prezydent Pòlsczi Andrzéj Duda, prezydent Ùkrajinë Wòłodimir Zełeńsczi i prezydent-elekt USA Donald Trump. Ti dwaji slédny przed ceremónią mielë téż pòtkanié w Elizejsczim Pałacu z prezydentã Francësczi Emmanuelã Macronã, jaczi téż przemôwiôł wieczorã z pòdzãkòwaniama dlô wszëtczich, chtërny przëczënilë sã do wróceniô katédrze ji snôżotë sprzed pòżaru.
W niedzelã 8. gòdnika bëła òdprawionô pierszô mszô swiãtô z òbrzãdã pòswiãceniô wôłtarza swiãtnicë przez arcëbiskùpa Pariza, Laurenta Ulricha.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie