Kanclérz Aùstrie Karl Nehammer zeszedł z ùrzãdu pò nieùdónëch negòcjacjach w sprawie ùsadzeniô rządowi kòalicje. Na jegò placu mòże stanąc przédnik Wòlnoscowi Partie Aùstrie, jakô dobëła welacjã z séwnika.
W sobòtã 4. stëcznika kanclérz Aùstrie Karl Nehammer ògłosył swòjã dimisjã z ùrzãdu kanclérza a téż z przódkòwaniô Aùstriacczi Lëdowi Partie. Misjã sfòrmòwaniô rządu dostôł pò parlamentarny welacje ze séwnika, w jaczi dobëła nacjonalisticznô prawiznowô Wòlnoscowô Partiô Aùstrie z rezultatã 28,85%. Szef Lëdowców òstôł wëznaczony na kanclerza przez niechãc jinëch partiów do wespółtwòrzeniô rządu z przédnikã Wòlnoscowi Partie Aùstrie, Herbertã Kicklã. Decyzjô Nehammera je zrzeszonô z niedogôdanim sã z jinszima partiama w sprawie ùsadzeniô rządowi kòalicje. Prezydent Aùstrie Alexander van der Bellen pò rozmòwie z ùstãpiwającym kanclerzã w niedzelã na pòstãpny dzéń przërôcził na pòtkanié Herberta Kickla. Prezydent tłómaczi, że stojizna strzód partiów zmieniła sã i dzysdnia na pòliticzny binie je wicy chãcë do wespółrobòtë z Wòlnoscową Partią Aùstrie. To znaczi, że Kickl mô szanse na òstanié nowim szefã rządu. Wòlnoscowô Partiô Aùstrie bëła òbskarżiwónô ò szérzwienié nacjonalisticznëch i prorusczich zéwiszczów, chãc ògrańczeniô rolë białków w pùbliczny òbéńdze.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie