Ùkrajińskô diplomacjô wskazéwô na przëwiązanié Ùkrajińców do symbòliczi, chtërna w Pòlsce sã parłãczi w przédny rédze ze zbrodniama na Wòłiniu.
W pòniedzôłk dwadzestégò piątégò zélnika prezydent Pòlsczi Karól Nawrocczi zapòwiedzôł prawòdôwczą inicjatiwã, mającą zrównac banderowską symbòlikã z nazystowską i kòmùnisticzną i wpisac jã kòl nich do sztrôfnégò kòdeksu. Jidze przede wszëtczim ò czerwiono-czôrną fanã, parłãczoną w Pòlsce z Òrganizacją Ùkrajińsczich Nôrodników i Ùkrajińską Pòwstańczą Armią, a strzód Ùkrajińców colemało ùznôwaną dzysdnia za òglową fanã biôtkùjący Ùkrajinë – symbòl ò apartnym znaczenim w stojiznie prowadzony wòjnë z Ruską. Diplomaticzné zdrzódła przekôzałë, że Kijiw przestrzégł pòlsczé wëszëznë przed wprowôdzanim nowégò zapisënkù, cwierdzącë że mòże òn sprawic negatiwné òdpòwiescë w ùkrajińsczi spòlëznie, co bãdze wëmôgało pasowny òdpòwiescë rządu. Ùszłi przédnik ùkrajińsczégò Institutu Nôrodny Pamiãcë Wòłodimir Wiatrowicz téż negatiwno skòmentérowôł ùdbã Nawrocczégò, piszącë w spòlëznowëch mediach, że spòdlé banderowsczi dejologie to biôtka ò ùkrajińsczé państwò, wòlnosc dlô nôrodów i jednostczi ë òpiarcé na gwôsnëch sëłach, co sã z nazyzmã nijak nie parłãczi. Scwierdzył, że w pòzdrzatkù pòlsczégò prezydenta widzy szlachòwnosc za pòzdrzatkã Pùtina, jaczi nikwienié wszëtczégò co ùkrajińsczé nazéwô denazyfikacją.
H.S.Sz.
Twoje zdanie jest ważne jednak nie może ranić innych osób lub grup.
![Co? Dze? Czedë? [30.06-6.07]](https://cdn.cmc-gallery.pl/static/files/gallery/590/thumb__1699237_1751271124.webp)
Komentarze opinie