Reklama

Dôł sënowi barniã do rãczi

Klëka

05/03/2026 10:40

Apalachee high school. Òdj. MallardTV; zdrzódło: https://en.wikipedia.org/wiki/2024_Apalachee_High_School_shooting#/media/File:Apalachee_HS.jpg

Nawet do sto òsmëdzesąt lat sôdzë mòże ùczëc ùznóny winnym òjc atakòwnika na szkòłã w Winder w dwa tësące dwadzestim czwiôrtim rokù.

Sąd w grôfstwie Barrow w stanie Georgia ùznôł òjca sprôwcë szkòłowi strzélindżi winnym dwadzesce sétmë òbwinów, w tim dwùch mòrdarstwa drëdżégò stãpnia i dwùch nieùmëslnégò sprawieniô smiercë. Piãcdzesąt piãc lat stôri Colin Gray sóm wëchòwiwôł sëna Colta, jaczi dwa lata nazôd w gardze Winder wlôzł do szkòłë Apalachee High School z flińtą i zaczął strzélingã. Zabił dwùch szkólnëch i dwùch ùczniów, a dzewiãc òsób renił. Miôł tej sztërnôsce lat, a flińtã dostôł na Gòdë òd òjca. Bëło to czile miesący pò tim, jak nôscelôtk béł kôróny za internetowé grozbë szkòłowi strzélindżi. Òstôwiôł téż wiele jinëch szlachów pò tim, co miôł ùdbóné. Wedle sądu òjc widzôł dniownik sëna, w jaczim ten òkazéwôł niezdrowé zainteresowanié szkòłowima strzélingama. Nie zrobił nic, żebë zagwësnic sënowi psychòlogiczną pòmòc. Chòc Colin Gray nie przëznôł sã do winë i gôdôł, że nic ò planach sëna nie wiedzôł, òstôł ùznóny winnym. Wërok jesz nie òstôł ògłoszony, ale grozy mù òd trzëdzescë do nawet sto òsmëdzesąt lat sôdzë. Je to trzecy przëtrôfk w Zjednónëch Stanach, gdze starszi je sądzóny w związkù z atakã na szkòłã przez jich dzeckò. Jak dotąd pòstawioné chłopù òbwinë i mòżebnô sztrôfa są nôwëższé. Jegò syn żdże na swój proces.

H.S.Sz.

Załączniki