Pò slédnëch deklaracjach argentińsczi ministrë britijsczé wòjskò na Falklandach òstało stôwioné do poszëkù.
W tim tidzeniu béł ògłoszony dogôdënk midzë Wiôlgą Britanią a Maùritiusã w sprawie òstrowinë Czagòs na Indijsczim Òceanie, wedle jaczégò Zjednóné Królestwò przekôże rządë nad òstrowama Maùritiusowi, òstôwiającë równak wòjskòwą bazã na òstrowie Diego Garcia na co nômni 99 lat pòd britijskò-amerikańsczim panowanim. Na to òdpòwiedzało argentińsczé Ministerstwò Bùtnowëch Sprôw, chtërno wësłowiło nôdzejã na szlachòwné dzejanié w przëtrôfkù dérëjący òd 42 lat spiérczi ò òstrowinã Falklandów, zwónëch téż Malwinama. Argentińsczé ministerstwò ùznało dogôdënk za przëmiar do dalszich dzejaniów dlô bùdowaniô kònstruktiwnégò dialogù ze Zjednónym Królestwã w célu renegòcjacje w sprawie rządów nad archipelagã. Pò òdpòwiescë britijsczi administracje wskazéwający na czësto jinszą historiã òbëdwùch spiérnëch òbéńdów, argentińskô ministra Diana Mondino òdrzekła òstrzi: „Jidącë tą stegną, jaką më ju wëbrelë, z kònkretnym dzejanim, a nié blós pùstą retoriką, dostóniemë nazôd fùlną suwerennotã nad najima Malwinama. [...] Malwinë bëłë, są i wiedno bãdą argentińsczé” – pisała w òswiôdczenim.
Ò òstrowinã Falklandów Wiôlgô Britaniô i Argentina miałë midzë sobą w 1982 rokù wòjnã pò atakù Argentinë na òstrowë. Przez 3 miesące i 12 dni zdżinãło 907 lëdzy. Wòjna kòształa 2 miliardë dolarów.
Twoje zdanie jest ważne jednak nie może ranić innych osób lub grup.
Komentarze opinie