Dzesãcprocentowé cło na wszëtczé kraje na mòcë dekretu mô bëc wprowadzoné w żëcé piątégò łżëkwiata.
We strzodã drëdżégò łżëkwiata w Różanym Ògardze Biôłégò Dodomù prezydent Zjednónëch Stanów Donald Trump pòdpisôł dekret ò wprowadzenim nawzôjnëch cłów na całi swiat. Sztandardowé cło na wszëtczé towarë sprowôdzóné do Stanów je ùsztëftowóné na dzesãc procent, co tikô sã wszëtczich krajów na swiece, ale dlô niechtërnëch hańdlowëch partnerów òstałë wëbróné wëższé stawczi – dwadzesce procent dlô Eùropejsczi Ùnie, trzëdzescë sztërë procent dlô Chin czë nawetka sztërdzescë szesc dlô Wietnamù. Trump spòdzéwô sã, że swiatowi liderzë mdą do niegò zwònilë z żądaniama zmniészeniô abò znieseniô nowëch cłów. Tim kôże zdjic cła z amerikańsczich towarów. Wedle niegò, dekret mô bëc òdpòwiescą na ekònomiczné wëzwëskiwanié Americzi przez jinszé kraje. „Przez dekadë naji krôj béł łëpiony, rabòwóny, gwôłcony i pluńdrowóny przez państwa blësczé a daleczé, tak drëchów jak i wrogów” – cwierdzył. Nowé cła mają òbrzeszëwac òd sobòtë piątégò łżëkwiata. Kriticë ùdbë wskazéwają, że nowé cła nôgòrszi skùtk bãdą miałë dlô nôbiédniészich krajów, jaczé dotądka przedôwałë swòje produktë do Americzi. Dlô Eùropejsczi Ùnie zjinaka mô ni miec jaż tak wiôldżégò znaczënkù, bò ji gòspòdarzënk w przédny rédze stoji na hańdlu bënë swòjich grańców. Nômòcni òbcążonym ji krajã mają bëc Niemcë, jaczé dotądka przedôwałë do Americzi dosc wiele ze swòji mòtorizacje.
H.S.Sz.
Twoje zdanie jest ważne jednak nie może ranić innych osób lub grup.
Ten komentarz jest ukryty - kliknij żeby przeczytać.