Reklama

Dëtczi na łësejącëch

Klëka

20/12/2025 17:11

Òdj. Welshsk; zdrzódło: https://pl.wikipedia.org/wiki/%C5%81ysienie_androgenowe#/media/Plik:Alopecia.jpg

Kòrejańsczi chłopi cerpią na spòlëznowé wëkluczenié przez nieprzëstôwanié do sztandardów piãkna. Prezydent wëszedł z ùdbą na to, jak rząd mógłbë jim pòmòc.

Prezydent Pôłniowi Kòreji Li Dze Miung przekôzôł rządowi pòlét rozwôżeniô dodôwkòwi pòmòcë dlô łësejącëch. Dzysdnia zdrowòtné ùbezpieczenié òbjimô lékarzenié wëpôdaniô włosów, jeżlë je òno òd chòroscë, ale nié w przëtrôfkù geneticznëch przëczënów. Prezydent je za tim, żebë to zmienic, bò dzysdnia w Kòreji łësenié to nie je blós estetika, le kwestiô przedërchaniô. Są tam baro òstré sztandardë piãknoscë, a łësejący chłopi miéwają jiwrë z nalézenim robòtë a téż psychicznym zdrowim. Wedle badérowaniô z łońsczégò rokù dzewiãcdzesąt òsmë procent młodëch dozdrzeniałëch je zgòdą, że dobri wëzdrzatk dôwô spòlëznowi zwësk. Procëmnicë ùdbë prezydenta wskazéwają na to, że Kòreja mô pòwôżniészé jiwrë, jak chòcbë wësoczé wskazë sãzabiców, mizoginiô czë drãgszé chòroscë, jak rek. Ministra zdrowiégò Dzong Un Jong przëznôwô, że wprowadzenié taczi dodôwkòwi pòmòcë wëmôgałobë kómpleksowi analizë, bò mògłobë dac wiôldżi cësk na finance państwa. Systém zdrowòtnëch ùbezpieczeniów w Pôłniowi Kòreji mô deficyt ò równoznaczënie dzesãc miliardów złotëch.

H.S.Sz.