Wedle niechtërnëch donieseniów są to matka i córka, ale pòdszukòwny mają pòwòdë, żebë w to wątpic.
W sobòtã sódmégò czerwińca w rzimsczim parkù Villa Doria Pamphili szpacérëjący turiscë nalezlë pòd krzã jeżënë rozeblokłé cało kòl szescmiesãcznégò dzéwczëca. Pò wezwanim szandarów czile gòdzyn pózdni dwasta métrów dali karno Peruwiańczików dało szandaróm znac ò placu, z chtërnégò òd jaczégòs czasu dôwało czëc mòcną pôchã strëpielëznë. Òkôzało sã, że leżôł tam miech na smiecë, a w nim rozeblokłé cało kòl sztërdzescë lat stôri białczi. Prasowô agencjô LaPresse pòdała, że cała to matka i córka pòchôdającé ze wschódny Eùropë, ale wezwóny pòdszukòwny ni mògą dorazu tegò pòcwierdzëc, bò stãpiéń rozkładu cała białczi pòstąpił wiele barżi jak cała dzéwczëca. Baro òstróżno téż pòdchôdają do relacjów czile swiôdków, co gôdają że mają widzóné w tim parkù białkã w czôrnym klédze, jakô sã pòstrzelëła w głowã. Rëgnãła wëdowiédzô mającô wëwidnic sprawã i òdtacëc, czë białka i dzéwczã pò prôwdze bëłë ze sobą krewné. Służbë wstãpno zakłôdają dëbeltné mòrdarstwò. H.S.Sz.
Twoje zdanie jest ważne jednak nie może ranić innych osób lub grup.
Komentarze opinie