Reklama

Dwalatny dzéwùs zamkłi w swiãtnicë do cządu dozdrzeniwaniô

Klëka

01/10/2025 10:52

Kùmari z Katmandu, 2007 rok; aùtór: Clemensmarabu; zdrzódło: https://en.wikipedia.org/wiki/Kumari_(goddess)#/media/File:Nepal_Kumari.jpg

Nepalskô bòdżini wcelëła sã w dwalatną Aryã Tarã Shakyã – tak scwierdzëła kòmisjô kapłanów służącëch w swiãtnicë Taleju w stolëcë kraju.

We wtórk trzëdzestégò séwnika w Katmandu, stolëcë Nepalu, dwalatnô Arya Tara Skakya we wiôldżi procesje szasëjama gardu òstała wniosłô przez nôleżników swòji rodzëznë do swiãtnicë bòdżini Taleju, tczony tam przez hindujistów i bùddistów. Nie bãdze wëchadac ze swiãtnicë jaż do cządu dozdrzeniwaniô, bò kòmisjô kapłanów ùznała, że to òna je nową Kùmari – wcelenim żëwi bòdżini, jakô wedle mitu òbrażonô przez włôdcã chcała òpùscëc krôj, ale błagónô ò òstanié zapòwiedzała, że bãdze sã wcelac w dzéwczãta z klanu Shakya, a wëchadac z nich w òkòlim pierszi miesączczi. Zadanim nowi Kùmari bãdze ùdzeliwanié pùblicznëch błogòsławieństwów w czasu religiowëch i państwòwëch swiãt. Nie bãdze w tim czasu chòdzëła do szkòłë a do swiãtnicë bãdze dopùszczoné wąsczé karno rówieniczków, jaczé mdą ji towarzëłë. W czasu ji wprowadzeniô w lektice wëprowadzonô òstała ùprzédnô Kùmari, Trishna Shakya, jakô terô bãdze prowadzëła normalné żëcé w anonimòwòscë. Czej òna òstała ùznónô za wcelenié bòdżini w dwa tësące sétmënôstim rokù, grëpë aktiwistów prôw dzecka biôtkòwałë ò skùńczenié z tradicją. Tegò nie ùdało sã zjiscëc, ale wëbiôtkòwelë dlô Kùmari priwatną edukacjã w swiãtnicë i rządowé stipendium pò òpùszczenim swiãtnicë jakno òdpłacënk za lata przebëté w izolacje.

H.S.Sz.

Załączniki